Qala kúni merekesinde О́skemen shaharynyń ákimi Qýat Tumabaev uzaq jyl baspana kezeginde turǵan birneshe otbasyǵa páter kiltterin tapsyrdy.
Ekinshi toptaǵy múgedek Koka Qaısarova baspana kezegin baqandaı 27 jyl kútipti. Osy ýaqytqa deıin turmaǵan jeri qalmaǵan ol sońǵy kezderi ápkesiniń úıin meken etipti. Baspana azabyn ábden tartqan ana úıiniń aldyna qala ákiminiń kóligi toqtaǵanda óz kózine ózi senbeı: «Bulaı bolady dep kim oılaǵan?! Baspanadan múlde kúderimdi úze bastap edim. Aıtarǵa sózim bolmaı tur. Qýanyshymda shek joq», dep kóz jasyna erik berdi.
Al Qarlyǵash Dúketbaeva baspana kezegine 1992 jyly turypty. Ol kezdegi kishkentaı qyzynyń ózi qazir eki bala tárbıelep otyr eken. Jıyrma bes jyl boıy «óz úıi – óleń tósegin» taǵatsyzdana kútken qarııa Elbasy men oblys basshysyna, arnaıy kelgen qala ákimine alǵysyn aıtty.
Ablaket yqsham aýdanynda turatyn tórt balanyń anasy Álmıra Súttibaevanyń jer úıi osydan birneshe jyl buryn apatty dep tanylypty. Kóp balaly ana jaqynda shahar basshysynyń qabyldaýynda bolyp, jaǵdaıynyń nasharlyǵyn, densaýlyǵynyń syr berip, barlyq tisteriniń túsip qalǵandyǵyn aıtyp, járdem surapty. Qala ákiminiń kómegimen О́skemendegi tis emhanalarynyń biri ol kisiniń ótinishin qanaǵattandyryp, tisterin emdep beripti. Ázirge Álmıra Súttibaevanyń baspana kezegi kelmegen eken. As bólmesi aǵash tireýmen turǵan onyń úıine arnaıy barǵan Qýat Tumabaev jańa baspana alǵanǵa deıin ýaqytsha eki bólmeli páter beriletinin aıtyp, kóp balaly otbasyn bir qýantyp tastady.
Azamat QASYM, «Egemen Qazaqstan»
О́SKEMEN