Elordadaǵy «Qazaqstan» Ortalyq konsert zalynda Mádenıet jáne sport mınıstrliginiń uıymdastyrýymen Qazaqstannyń eńbek sińirgen qaıratkeri, Memlekettik kúzet qyzmeti Prezıdenttik orkestriniń ánshisi Ardaq Balajanovanyń «Salǵan ánim shirkin-aı!» atty shyǵarmashylyq keshi ótti.
Kesh basynda Ardaq «Aýylym kóship barady», «Jelsiz túnde jaryq aı», «Bozbala», «Oılan, qurbym» syndy ánderin Prezıdenttik orkestrdiń súıemeldeýimen kórermenderge tartý etse, Kenen Ázirbaevtyń sózine jazylǵan «Jaqsy bolsa jan jaryń» ánin úsh ishekti dombyramen, sondaı-aq «Asyl zat», «Qońyr jel» ánderin qos ishekti dombyramen oryndap berdi. Keshke ánshiniń ónerdegi qurby-qurdastary men aǵa býyn ókilderi Dosymjan Tańatarov, Klara Tólenbaeva, Elmura Jańabergenova, Erbolat Shaldybaev qatysyp, jyr-termeler men estradalyq ánder oryndady.
Ardaqtyń ónerge kelýi, onyń shyǵarmashylyq jetistikteri, ánshi retindegi erekshelikteri týraly ata-anasy Sábıra Ahmetova men Baıdilhan Balajanovtyń, ónerdegi ustazdary Bekbolat Tileýhan, Baqytjan Kenenulynyń pikirlerin, lebizderin kórermen zaldaǵy úlken ekran arqyly tamashalady. Baqytjan Kenenuly ánshige eń birinshi qajet nárse – daýystyń Ardaqta bar ekenin, onyń keń tynysty ánshilerdiń qataryna jatatynyn aıtsa, Bekbolat Tileýhan onyń ózine tán yrǵaqpen syrshyl ánder aıtatynyn, sondaı-aq óz mánerin tapqan ánshi ekenin jetkizdi.
Kesh barysynda Ardaq Balajanova «Paı-paı» trıosymen birge de án saldy. Sondaı-aq «Naz» memlekettik bı teatrynyń da óneri kópshilikke usynyldy.
Aıgúl SEIIL, «Egemen Qazaqstan»