«Astana» fýtbol klýbynyń bas bapkeri Stanımır Stoılov Eýropa lıgasynyń toptyq kezeńinde Ispanııanyń «Vılıarrealyna» qarsy oıyn jaıly oı bólisti. Ol match aldyndaǵy baspasóz konferensııasynda BAQ ókilderiniń suraqtaryna jaýap berip, komandadan qandaı nátıje kútetinin málimdedi.
– «Astananyń» «Vılıarrealǵa» qaıta oralǵanyna qýanyshtymyn. Eki komanda arasyndaǵy birneshe jyl burynǵy ótken kezdesýden keıin elordalyq komanda tıisti qorytyndy shyǵara aldy. О́z basym «Vılıarrealdy» bizge Eýropaǵa jol bastap bergen komanda dep atar edim. Erteńgi matchta óz oıynymyzdy kórsetip, laıyqty nátıjege jetýge tyrysamyz. «Vılıarreal» Ispanııanyń sońǵy jyldardaǵy úzdik komandalarynyń biri. Degenmen, «Astana» eshkimnen qoryqpaıdy dep senimdi túrde aıta alamyn.
– Stanımır, QPL-da ótken «Astana»-«Atyraý» oıynynan keıin Kabananganyń Ispanııaǵa barmaıtynyn aıtqan edińiz. Qazir Kabananganyń kelmeýin Qazaqstannyń da, Ispanııanyń da tilshileri talqylap jatyr. Al kongolyq oıynshy ınstagramynda osy oqıǵa týraly pikirin bildirgen bolatyn. Bul týraly ne aıtasyz?
– Bul máseleni men Astanada sheshtim degen oıdamyn. Maǵan «Astana» úshin baryn salatyn oıynshylar kerek. Al komandaǵa jeńiske jetý úshin kómektesetin oıynshylar qajet. Instagramdaǵy jazǵandaryn oqyp, jylaýǵa sál-aq qaldym. Alaıda, onyń jazǵandarynan keıin oıym ózgeredi deı almaımyn. Taǵy da aıtaıyn maǵan komandamen birge bolatyn oıynshylar kerek.
– «Astana» birneshe jyl buryn «Vılıarrealmen» kezdesip, ese jibergen bolatyn. Ol sizdiń komanda tizginin alǵash ustaǵan kezderińiz edi. Odan keıin úsh jyl ýaqyt ótti. «Astana» úshinshi jyl qatarynan eýrokýboktarda óner kórsetip keledi. Osy ýaqyt aralyǵynda komanda qanshalyqty ózgerdi? Al «Vılıarreal» týraly ne aıtasyz?
– «Astana» sońǵy úsh jylda barlyq jaǵynan ilgeri jyljydy dep senimmen aıta alamyn. Meniń oıynshylarym óte joǵary deńgeıde óner kórsetip keledi. О́zderine degen senimderi de arta tústi. Al «Vılıarreal» Ispanııanyń úzdik bes komandasynyń tizimine ilinip keledi. Alǵashqy tórt orynda «Barselona», «Real», «Atletıko» jáne Sevılıa sııaqty komandalar bar. Osyndaı úzdikter jınalǵandyqtan La lıgada chempıon ataný ońaı emes. Al «Vılıarrealdyń» Ispanııanyń úzdik bestigine enýi úlken jetistik dep bilemin.
– «Vılıarrealdyń» bas bapkeri oıyn aldyndaǵy baspasóz jıynynda birneshe oıynshynyń jaraqat alyp, «Astanaǵa» qarsy kezdesýde upaı joǵaltýy múmkin ekendigin aıtty. Buny bizge berilgen bir jeńildik dep qarastyrýǵa bola ma?
– «Vılıarrealdyń» chempıonattaǵy alǵashqy kezdesýlerin kórip shyqtym. Shynyn aıtsam, osal emestigin baıqadym. Fýtbolda jeńis pen jeńilis qatar júredi. Sondyqtan, olardyń eki oıyndaǵy jeńilisinen úlken problema kóterýdiń esh qısyny joq. «Vılıarreal» quramynda qıyndyqtar bolsa, ol jaǵdaı bizde joq emes, qaıta eki ese qıyn deýge bolady. Bizge qazir óz oıynymyz týraly oılanýymyz kerek. Osyǵan deıingi kórsetip júrgen oıynymyzdan jańylyp qalmaı, óz deńgeıimizdi kórsetýimiz qajet. Shabýyl men qorǵanysqa birdeı jumylýymyz kerek. Sonda kútken nátıjemizge de qol jetkizemiz.
– Qazaqstan quramasy álem chempıonatyń irikteý kezeńi aıasynda ótkizgen eki kezdesýde sátsiz oıyn kórsetti. «Astana» Qazaqstannyń namysyn Eýropada laıyqty dárejede qorǵap júrgen jalǵyz komanda. Bul sizderge qosymsha qysym bola ma?
– Men eń birinshi óz komandama jaýapty berýim kerek. Eshkim jeńilgendi qalamaıdy. Meniń oıynshylarym erteń alańda ózderine tán oıyn úlgisin kórsetedi degen senimdemin. Olarǵa tolyqtaı senim artamyn. Match taǵdyryn bir-eki oıynshy sheshpeıdi, komandalyq oıyn mańyzdyraq. Al Kabananganyń Astanada qalǵany erteńgi oıynǵa tikeleı áser etedi deı almaımyn.
– Qazaqstan quramasynda oınaıtyn «Astana» oıynshylary ótken eki matchtaǵy sátsizdikten keıin kóńil-kúıleri túskeni anyq. Osy oraıda, komandanyń birqatar oıynshylaryn erteńgi oıynǵa psıhologııalyq turǵyda daıyndaý qanshalyqty qıyn boldy?
– Meniń qaramaǵymdaǵy jigitter – kásibı deńgeıdegi fýtbolshylar. «Atyraýǵa» qarsy oıynda ózderin dáleldi. Sondyqtan erteńgi kezdesýde kásibılikterin óz oıyndarymen dáleldeıdi degen senimdemin.
Aıan ÁBDÝÁLI, «Egemen Qazaqstan»