Oqyrman jaqsylyǵyn jetkizedi
Jańa mekteptiń jóni bólek
Almaty oblysynda byltyr 900 oryndyq mektep paıdalanýǵa berilgen bolatyn. Jańa nysan Kerbulaq aýdanyndaǵy Saryózek aýylynda boı kótergen. Oqýshylarǵa arnalǵan bilim ordasy «Nurly jol» baǵdarlamasy boıynsha salynyp otyr. Ǵımarat qurylysy men jabdyqtaryna ulttyq qordan jáne jergilikti bıýdjetten 1,5 mlrd teńgege jýyq qarajat bólindi. 12 myńnan astam turǵyny bar eldi mekende osy ýaqytqa deıin 3 mektep jumys istedi. Jańadan ashylǵan bilim shańyraǵyna kezinde 30 synyp jınaqtalyp, 750 oqýshy qabyldandy. Al olardy 60 muǵalim bilim nárimen sýsyndatqan bolatyn.
Mektep ǵımaratynyń syrtynda 2752 sharshy metrdi quraıtyn jańa úlgidegi jasandy kógal tóselgen fýtbol jáne voleıbol men basketbol oıyndaryna arnalǵan alańdar salyndy. Bul jaqsy istiń sharapatyn aýyl turǵyndary bıyl da kórmek.
Samal QABYShEVA
Almaty oblysy
...jańalyǵyn bólisedi
Jańbyrlatqysh júıe qashyqtan basqarylady
Bizdiń «Aktep» JShS ujymyna «Bıznestiń jol kartasy-2020» baǵdarlamasynyń qarjylaı qoldaýy shapaǵatyn tıgizgenin rızashylyq sezimmen aıtqym keledi. Sonyń arqasynda radıýsy aýqymdy 7 jańbyrlatqysh mashına satyp aldyq. Onyń sýarý aıasy 440,5 gektar aýmaqty qamtıdy. Biregeı qurylǵy tyńaıtqysh qosý keshenimen jaraqtanǵan. Onyń qashyqtan basqarý júıesi onlaın tártibimen jumys isteýge óte yńǵaıly. Tıimdi tehnologııanyń kómegimen keler jyly 5 myń tonna kartop jınaýdy josparlap otyrmyz. Bul oblys turǵyndarynyń kókónistiń osy túrine degen qajettilik mólsheriniń altydan biri. Sóıtip, biz osynaý teńdesi joq jańbyrlatqysh júıeni iske qosý arqyly jergilikti ónimdi kóbeıtýge múmkindik alyp otyrmyz.
Boranbek AQTAILAQOV,
joba jetekshisi
Aqtóbe oblysy,
Qarǵaly aýdany
...oı qozǵaıdy
Ustazdy ardaqtaı bileıik
«Ult bolashaǵy – urpaq desek, urpaqtyń bolashaǵy ustazdardyń qolynda» ekeni qaı kezde de belgili. Baspasóz ustazdyń qoǵamdyq ómiri týraly jazady, keıbiriniń sabaq berý ádisi men tájirıbesin nasıhattaıdy. Al búgingi ustaz tegin qoǵamdyq jumys kúshine aınaldy. Senbilikter de, túrli áleýmettik-kópshilik jumystar da solardyń kúshimen atqarylady. Degenmen, qazirgi zamanda ustaz degenimiz kim jáne dárejesi qandaı degen suraqqa naqty jaýap beretin ýaqyty keldi.
Buryn ustaz – bedeli bıik jáne ómirlik tájirıbesi baı, joǵary saýatty maman edi. Ustazdy qadirleý jáne joǵary baǵalaý – bolashaq urpaqty tárbıeleýde mańyzdy ekenin ata-analarymyz túsingen bolatyn. Osyndaı tárbıe alǵan biz ustazdardy qadirlep, dárejesin odan ári kótere túsýimiz qajet edi. Kerisinshe, biz ustazdardy tıisti dárejede qadirleı almaıtyn boldyq. Buǵan ne sebep? Tárbıe máselesinde olqylyq jiberip aldyq pa, álde ardaqty atqa kir keltiretin ustazdar kóbeıdi me? Joq, bolmasa ustazdy mensinbeıtin shákirtter, ustazdyń kim ekenin tanyǵysy kelmeıtin ata-ana kóbeıdi me? Shyntýaıtyna kelgende, munyń barlyǵy bizdiń ustazdarymyzdyń jan-dúnıesin túsinip, tıisti dárejede taný múmkindigin jiberip alýymyzda. Qazir mektepke ne joǵary oqý oryndaryna baryp sabaqqa qatysyp kórseńiz, ustazdyń joǵary bilimdi jáne kásibı maman ekenin kórýge múmkindigimiz bar. Ustaz týraly aqparat jetispeýshilikten olardy tıisti dárejede syılaı bilý jetispeıtini belgili. Sondyqtan qoǵamda ustaz mártebesin ózgeshe tanytýdyń ýaqyty keldi. Olqylyqtardyń ornyn toltyryp, muǵalim bedelin kóterýdiń naqty joldaryn kóp bolyp oılastyrsaq deımiz.
Temirhan ÁBDIKOV,
J.Baıǵuttıev atyndaǵy óner mektebiniń muǵalimi
Ońtústik Qazaqstan oblysy,
Arys qalasy
...ókinish bildiredi
Ákeme durys kóńil bóle almadym...
Ákeler de óz sábıin anasynan artyq súımese, kem súımeıdi. Ákemniń densaýlyǵy nashar bolǵandyqtan, anam árdaıym ákemnen kóp eńbek etetin. Eseıe kele anamnyń jumystan sharshap kelgenin kórgende ashýlanyp, ákeme aýyr sózder aıtatyndy shyǵardym. «Nege anamdy jumys istetip qoıyp, ózińiz únemi úıde jatasyz?» dep ashýlanatynmyn. Men qansha kóńiline keletin sóz aıtsam da, ákem maǵan esh daýys kótergen emes. Qazir oılasam, ol kisige de ońaı bolmaǵan eken ǵoı...
Joǵary oqý ornyna túskennen keıin men de anama qolǵanat bolaıyn dep, otbasylyq kásipke aralasa bastadym. Kóp uzamaı kásiptiń qyr-syryn uǵynyp, isimizdi alǵa dóńgelete bastadym. Sol kezde anamnyń aıtqanyn sabyrmen tyńdap, al ákem aqyl aıta bastasa birden ashýǵa býlyǵyp shyǵatynmyn. Jumystan basqa ómirlik, tárbıelik aqyl-keńesterin tyńdaıtynmyn. Degenmen, anama qaraǵanda ákeme kóp kóńil bólmegen ekenmin. Isimiz ilgerilep, jaǵdaıymyz endi jaqsaryp kele jatqanda ákemniń júregi ustap, tilge kelmeı baqılyq boldy. Sol sátte kezinde aıtqan aýyr sózderim úshin, daýys kótergenim úshin ákemnen keshirim surap úlgermeı qalǵanyma qatty ókindim...
Ashý men yzaǵa, asyǵystyq pen aqymaqtyqqa boı aldyryp ákemdi kóp renjitken ekenmin. Bar mahabbatym men qamqorlyǵymdy anama syılap, ákeme durys kóńil bólmegenime ókinemin. Tirisinde qýanyshqa bóleı almaǵan ákeme qazir Quran baǵyshtap, arýaǵyna duǵa qylýdan basqa eshbir sharam joq...
Baýyrjan MAQSATULY
Qaraǵandy
...áserin aıtady
О́miriń – maqpal óńindeı
Tókpe jyrdyń dúldúli Uzaqbaı Qazjanulynyń týǵanyna 120 jyl tolýyna oraı Saıyn Shapaǵatov eldi mekeninde «О́miriń – maqpal óńindeı» atty eske alý jyr keshi ótti. Tanymdyq sharada aýyl əkimdiginiń bas mamany Raı Amanǵalıuly men mektebimizdiń dırektory Ǵalııa Izdibaıqyzy mektebimizge at basyn arnaıy burǵan Amandyq Kómekulyna alǵysyn aıtty. Mədenıet qaıratkeri, jyraý, professor Amandyq Kómekuly dańǵaıyr jyraý jaıynda aǵyla sóılep, tógilte jyrlady. Mektebimizdiń maqtanyshy, halyqaralyq, respýblıkalyq saıystardyń júldegeri, jas talant ıesi Merýert Rahmetova Uzaqbaı aqynǵa arnaýyn oqyp, jyraýdyń «El – qonystan aýǵanda» termesin tartyp, Amandyq Kómekulynyń batasyn aldy. Sondaı-aq, «Qazaqstan-Aqtaý» telearnasynyń «Sóz ben saz» baǵdarlamasynyń júrgizýshisi Berdihan Əlmen Uzaqbaı aqyn-jyraýdyń óz qoljazbalarymen tanystyryp, tyń aqparattardan qulaǵdar etti.
Gúlmıra QALMENOVA,
№1 mektep-lıseıi qazaq tili men ádebıeti pániniń muǵalimi
Mańǵystaý oblysy,
Túpqaraǵan aýdany