Prezıdenttiń «Bolashaqqa baǵdar: rýhanı jańǵyrý» atty baǵdarlamalyq maqalasynda aıtylǵan «Týǵan jer» baǵdarlamasy negizinde júzege asqan taǵy bir ıgi sharýa Eńbekshiqazaq aýdanynyń Ashybulaq aýylynda ashylǵan saıabaq. Ár azamatty ózi týyp-ósken jerdiń ósip-órkendeýine úles qosýǵa shaqyratyn baǵdarlamany iske asyrý barysynda ákimdik pen jeke kásipkerlerdiń áriptestigi negizinde birqatar sharýalar qolǵa alynǵan. Jemis-jıdek pen kókónisterdi ozyq úlgidegi tehnologııa boıynsha ósirip, oblysty sapaly ónimmen qamtamasyz etip otyrǵan «Amal Bio» jaýapkershiligi shekteýli seriktestiginiń ıesi Sabyrovtar otbasy aýyldan jańa saıabaq ashýdy qup kóripti.
Alǵashqy qazyǵy osydan úsh aı buryn, «Týǵan jerge týyńdy tik» aksııasynda qaǵylǵan nysandy salýǵa seriktestik esebinen 30 mıllıon teńge bólingen. 100-den asa jas kóshet pen sándik aǵashtar otyrǵyzylyp, kógaldandyrylǵan. Zamanǵa saı tolyqtaı abattandyrylǵan saıabaqta aýyl adamdarynyń demalýyna barlyq jaǵdaı jasalǵan. Ádette aýyl dese, kósheni shańdatyp oınap, jol boıynda dop qýyp júretin bala-shaǵa elesteıtin. «Shybyq minip óstim» deıtin sóz poezııamen astasqanda, burynǵylardyń balalyq shaǵyna qatysty aıtylǵanda jarasatyn. Al búgin basqa zaman. Ýaqyttyń talaby bólek. Rasynda, shybyqty at qyp minip júrgen balany kórmeısiń qazir. Sebebi basqa da qyzyqtar, kóńil aýdarar dúnıeler az emes. Tipti «balamyz úıden shyqpaıtyn boldy, smartfonnan kóz almaıdy», dep shaǵynatyndar da az emes. Al aýylyńda zamanǵa saı (smartfonnan kórip júrgen) jetildirilgen saıabaq tursa, áńgime basqa. Osy jaǵynan alǵanda, ózderi týyp-ósken aýylǵa shaǵyn fýtbol alańy, balalardyń oınaýyna arnalǵan túrli alańqaılar, strıtbolǵa arnalǵan shaǵyn alań, 130 oryndyq konserttik sahna ornatylǵan baq salyp berý aýyldyń kórkin kirgizýmen qatar, birtalaı máseleni sheship beretini anyq.
«Kópke úlgi bolatyn is», dep jatty kóldeneń jurt. Bul, aldymen, jańa bastama. Saıabaq, arnaıy jabdyqtalǵan oıyn alańdary degenińiz tek ortalyqtyń, qalanyń balalaryna ǵana tıesili dúnıedeı kórinetin. Osydan keıin, «bizdiń aýylda saıabaq bar» dep maqtaný ádetke aınalar. Bul óz kezeginde biraz azamattarǵa oı salar. Osy kúnge deıin meshit salýmen ǵana shektelip kelgen qaltaly azamattar budan bylaı aýyldastaryn, izbasarlaryn basqa jaǵynan da qýantýdy oıǵa alar. Sóıtip jańa urpaq «qalada mynadaı eken, shetelde anadaı nárseler bar deıdi» dep alysqa kóz satyp, jarym kóńil ósýden arylar.
Atalmysh parktiń aýmaǵy 1 gektar. Joǵaryda atalǵan oıyndar ǵana emes, óz qalaýlary boıynsha voleıbol, basketbol sııaqty sport túrlerimen de aınalysýǵa múmkindikteri bar. Sahnanyń oryn tebýi, aldymen kesh batsa-aq ne isterge bilmeı, sendelip, kóshe kezip júretin aýyl jastaryna paıdaly. Naǵyz mádenı ortalyq. Asqar jáne Dınara Sabyrovtarǵa eldiń rızashylyǵy alabóten. О́ńir basshysy da parktiń ashylýyna arnaıy qatysyp, «elge degen peıilin, jerge degen meıirin yqylaspen kórsete alǵan» kásipkerlerge eldiń atynan, óziniń atynan alǵys aıtty. Bul alǵysty keleshek urpaq ta aıtady. «Atańnan mal qalǵansha, tal qalsyn» deıtin el, búgingi jas shybyq erteń báıterekke aınalǵanda, saıasyna otyrǵan saıyn alǵys jaýdyrary sózsiz.
Al Sabyrovtar munymen toqtamaımyz dep otyr. Aldaǵy jospar – dál osyndaı saıabaqty J.Qaıypov jáne Qazaqstan aýyldarynan ashý. «Amal Bio»-nyń ıgiligin osynda jumys istep, nápaqa taýyp júrgen aýyldyq okrýgtiń 100-den asa turǵyny ǵana emes, endigide saıabaqta oınaıtyn bala-shaǵa da kóretin bolady.
Almas NÚSIP,
«Egemen Qazaqstan»