Bul týraly búgin Aqtaýda Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary general-maıor Muhametqalı Satov «Qoǵamnyń rýhanı jańǵyrýy, Qazaqstannyń ulttyq kody men mádenıetiniń saqtalýy» taqyrybyndaǵy dóńgelek ústelde baıan etti.
Onyń jumysyna óńir jetekshiligi, quqyq qorǵaý organdary, kúsh qurylymdarynyń ókilderi, tárbıeshi ofıserler, ásker ardagerleri men jalpy bilim beretin oqý oryndarynyń oqýshylary qatysqan bolatyn.
Memleket basshysy N.Nazarbaevtyń «Bolashaqqa baǵdar: rýhanı jańǵyrý» kólemdi baǵdarlamasyn júzege asyrý, quqyqtyq tártip áskerleriniń ıgi dástúrleri men tarıhyn saqtaý men keleshek urpaqqa jetkizý maqsatynda mundaı basqosýlar zııaly qaýym ókilderiniń qatysýymen elimizdiń ár aımaǵynda ótkizilip keledi.
Elbasy óz maqalasynda «Jańa turpatty jańǵyrýdyń eń basty sharty – ulttyq kodyńdy saqtaı bilý. Ol zamana synynan súrinbeı ótken ozyq dástúrlerdi tabysty jańǵyrtýdyń mańyzdy alǵysharttaryna aınaldyra bilý qajet» ekendigin naqty atap kórsetti.
«Quqyqtyq tártip áskeriniń aıaǵynan tik turyp, damý tarıhy, onyń ótkeni men keleshegi elimizdiń tarıhymen etene baılanysty. Ulttyq ulannyń tarıhyn memleketimizde tynyshtyqty saqtap, qoǵamdyq qaýipsizdikti qamtamasyz etý arqyly onyń jaýyngerleri jasaıdy. El óz batyry men erjúrek erlerin bilýi qajet. Jas urpaq olardyń erligi úlgisinde tárbıelenip, aǵa urpaqtyń ıgi dástúrin laıyqty jalǵastyrýy paryz. Osy oraıda jáne «Qazaqstannyń 100 jańa esimi» kólemdi jobasy aıasynda Ulttyq ulan Bas qolbasshysy general-leıtenant Rýslan Jaqsylyqovtyń bastamasymen bizdiń áskerde osyndaı tektes «Ulttyq ulannyń 100 jańa esimi» jobasyn ótkizý týraly sheshim qabyldandy», dedi óz sózinde general-maıor Muhametqalı Satov.
Atap aıtý kerek, atalǵan joba Ulttyq ulannyń ár áskerı bólimin qamtıdy. Áskerı bólimsheler qolbasshylyǵy, ásker ardagerleri jáne áskerı qoǵamdyq uıymdar ókilderinen turatyn komıssııa quramy laıyqty degen úmitkerlerdi olardyń sińirgen eńbekteri, qyzmettik-jaýyngerlik árekettegi jetistikteri jáne memlekettik nagradalardyń ıelik etýine qaraı baǵalaıdy.
100 jańa esim jobasy alǵashqyda ár áskerı bólimde, keıin óńirlik qolbasshylyq deńgeıinde, tek sodan baryp Ulttyq ulan kóleminde irikteledi. Jobanyń jemisti nátıjesi retinde Ulttyq ulannyń jańa esimderiniń ómiri men tarıhy týraly arnaıy kitap jaryqqa shyqpaq. Sondaı-aq, jańa esimder jaıly málimetter vedomstvonyń resmı saıtynda da ornalastyrylady. Joba 2018 jyldyń maýsym aıyna deıin jalǵasatyn bolady.
Nurlybek DOSYBAI,
«Egemen Qazaqstan»