Búgingi kúni memleket erikti negizdegi ózin ózi retteıtin uıymdardy qurý arqyly kásipkerlik sýbektilerin biriktirýge múddeli. Munyń aıasynda memlekettik qyzmetter beriletin mindetti ózin ózi retteýge kóshý tetikteri qamtamasyz etiletin bolady.
Bul sharalar Úkimetke memlekettik qyzmetterdi qysqartý esebinen yqshamdala túsýge múmkindik beredi. Josparlanyp otyrǵan memlekettik organdardyń baqylaý jáne qadaǵalaý qyzmetteriniń sanyn qysqartý jóninde málimdegen Ulttyq ekonomıka vıse-mınıstri Serik Jumanǵarın qosarlanýyna jáne tıimdiliginiń bolmaýyna baılanysty 114 baqylaý salasynyń 24-in jáne 18 qadaǵalaý salasynan 3-eýin joıý josparlanyp otyrǵandyǵyn alǵa tartady. Onyń túsindirýinshe, qosarlanatyn jáne memleket pen tutynýshynyń qaýipsizdigine qater tóndirmeıtin memlekettik organdardyń 540 baqylaý jáne qadaǵalaý qyzmetteri jaqyn kúnderi joıylatyn kórinedi.
«Sáıkesinshe Ákimshilik quqyq buzýshylyq týraly kodekstiń 30 baby boıynsha ákimshilik isterdi qozǵaýǵa ókiletti organdardyń quzyreti men baptary joıylady. Sondaı-aq, basqa organdarǵa Bas prokýror, onyń orynbasarlary, oblys, respýblıkalyq mańyzdaǵy qalalar, Astana prokýrorlarynyń deńgeıine deıin tekserý júrgizýge tapsyrma berý quqyǵyna ıe prokýratýra organdary tulǵalarynyń tizbesi qysqartylatyndyǵyn da atap aıtý qajet», deıdi ol.
Al endi búgingi tańda qyzý talqylanyp jatqan kásipkerlik jáne kásibı ortada ózin ózi retteý ınstıtýtyn damytý jaıy qalaı bolady jáne bul ınstıtýt kásipkerlerge ne beredi degen máselege kelsek, onyń mánisi mynadaı negizde júzege asyrylýda.
Aıtalyq, osy kúni memleket kóptegen qyzmetterge ıe jáne olardyń birqataryn kásipkerlik ortaǵa derbes retteýge berýdiń tetikteri qarastyrylýda. Bul bıznestiń olar retteıtin kásipkerlik qyzmet salasyndaǵy derbes sheshimder qabyldaýǵa qatysýy maqsatynda jasalady. Sonymen birge, memleket belgili bir qyzmetterdi kásipkerlerdiń birlestikterine berý kezinde bıznesti rettemeıdi de baqylamaıdy da. Bul qyzmetterdi bıznestiń ózi osyndaı birlestikter túrinde júzege asyrady. Demek, memleketke kásipkerlerdiń bul birlestikteriniń qyzmetiniń zańdylyǵyn baqylaý ǵana qalady degen sóz.
Mamandar eldegi kásipkerlik salany retteýdiń mundaı ádisi «О́zin ózi retteý» zańyna da saı keletindigin aıtady. Sebebi, atalǵan zańda ózin ózi retteýdiń eki túri qarastyrylǵan: erikti jáne mindetti. Osy jerde aıryqsha atap óterlik jaıt, erikti ózin ózi retteý tetigi memlekettik retteýmen qatar áreket etse, al mindetti memlekettik organdar oryndaıtyn belgili bir deńgeıdegi salalyq qyzmetterdi retteý zań negizinde júzege asyrylatyn bolady.