Astana qalasyndaǵy «Qazmedıa» ortalyǵynda ótip jatqan «Astana Media Week» aptalyǵy aıasyndaǵy sessııada Halyqaralyq qarjy ortalyǵynyń basshysy Ernur Rysmaǵambetov ómirindegi eń qyzyqty motıvasııalyq oqıǵalarymen bólisti.
«Bala kúnimde dombyrada oınaýǵa qatty qyzyǵatyn edim. Biraq meniń týyp-ósken jerim qalaly jerden shalǵaı ornalasqandyqtan, úıirmelerge ózim bara almaıtynmyn. Sál eseıgennen keıin osy maqsatyma jetý úshin dombyra mektebine baryp jazyldym. Biraz kúıdi úırendim. Biraq jetekshilerim ansamblderge qatystyrmaıtyn. Sebebi, men áriptesterime qaraǵanda jyldam shertip, shatasyp qalatynmyn. Sol kezde men ómirime qajet birnárseni túıdim. Eshqashan oza shappaı ári kóshtiń sońynda qalyp qoımaý qajet eken. Bir sózben aıtqanda ár adam zamanyna saı bolý kerek», dedi Ernur Rysmaǵambetov.
Ernur Rysmaǵambetov mektep oqýshysy kezinde de, stýdenttik shaǵynda da biraz jetistikke jetken. Ol 2003 jyly Taıpeıde ótken 34-shi halyqaralyq fızıka olımpıadasynyń altyn júldegeri, sondaı-aq fızıka páninen ótken halyqaralyq, dúnıejúzilik olımpıadalardyń birneshe dúrkin jeńimpazy, álemniń eń úzdik ýnıversıtetteriniń biri bolyp sanalatyn Kalıfornııa tehnologııalyq ýnıversıtetin (CalTech) tamamdaǵan. Biraq bir qyzyǵy bala kúninde fızıkaǵa múldem qyzyqpapty, tipti unatpaǵan eken. Bári Jezqazǵan qalasyndaǵy bilim ınnovasııa mektebine (qazaq-túrik lıseıi) túskennen keıin bastalypty. Jańa mektepke barǵannan keıin muǵalimderi fızıka páninen túrli olımpıadalarǵa jibergen.
«Synyptastastarym túrli elderdegi olımpıadalarǵa qatysyp júretin. Al meniń armanymnyń biri ózge memleketterge barý bolatyn. Bul maǵan qarjylaı qıyn edi. Sondyqtan oqý arqyly armanymdy júzege asyrýǵa tyrystym. Kúnine on saǵat ýaqytymdy fızıkaǵa arnadym. Ýaqyt óte kele aýdandyq, qalalyq, oblystyq, respýblıkalyq olımpıadalarda jeńiske jete bastadym. О́z ýaqyty kelgende halyqaralyq jarystarda elimniń namysyn qorǵaıtyn boldym. Azdaǵan ýaqyttyń ishinde Túrkııanyń Antalııa qalasynda, Indonezııanyń Balı qalasynda, Sıngapýrda, Taılandta ótken olımpıadalarǵa qatystym. Sondyqtan ómirde birnársege jetý úshin tyrysý kerek, jeńiske jetý kerek», dedi ol.
Budan keıin Ernur Rysmaǵambetov Kalıfornııadaǵy oqýy jaıly aıtty. Qasynda birge bolǵan eki dosy arqyly úlken jetistikterge jetkenin esine aldy. Osy oraıda ol jınalǵan qaýymǵa kásibı adamdarmen jaqynyraq aralasýdy keńes etti. Sebebi, kásibı mamandarmen aralasý arqyly ózińniń de jyldam damıtynyńdy alǵa tartty.
Ernur Nurmaǵambetov búginde QR Ulttyq komandasyn mekteparalyq ǵylymı jarystarynyń daıyndyǵyna belsendi qatysýshylarynyń biri. Sońǵy bes jylda jattyqtyrýshy retinde oqýshylary 25 múmkin medaldiń ishinen 24-in jeńip alǵan. Onyń 6-aýy altyn, 15-i kúmis jáne 3-eýi qola. Nebári 31 jasynda bıik belesterdi baǵyndyryp úlgerdi. О́mir jolyna qarasaq, ol dombyra shertýmen de aınalysqan, fızıka mamany da bolǵan, qarjy salasynda bilim alǵan. Osy arada kópshiliktiń oıyna onyń o bastaǵy armany, maqsaty qandaı boldy eken degen saýaldyń týyndary anyq.
«Shynymdy aıtsam, armanym da, maqsatym da kóp bolatyn. Biraq bireýin baǵyndyrǵannan keıin «ary qaraı ne isteımin?» degen suraq únemi mazalaıtyn. Osylaısha aldyma jańa maqsat qoıatynmyn. Biraq bul isti men súısinip, rahattanyp otyryp júzege asyrýym kerek. Mine, osy kezde nátıjesi de bolady», dep sózin qorytty Ernur Rysmaǵambetov.