Búgin Qazaqstan quramasy fýtboldan 2018 jylǵy álem chempıonatyna irikteý kezeńi aıasynda Rýmynııa quramasyna qarsy kezdesý ótkizip, jeńilip qaldy.
Rýmynııanyń Ploeshtı qalasyndaǵy Ilıe Oane atyndaǵy stadıonynda ótken kezdesýde jerlesterimiz qarsylastaryna 1:3 esebimen ese jiberdi. Matchtyń alǵashqy 15 mınýty teń dárejede ótti. Osy ýaqyt aralyǵynda qazaqstandyq fýtbolshylar bir-eki ret Rýmynııa quramasynyń qaqpashysy Chıprıan Teterýshanýdyń sergektigin tekserip kórgen bolatyn. Aradan eki mınýt ótkende rýmyn fýtbolshylary bizdiń qaqpamyzdyń kiltin izdep kórdi. Oıynnyń 33-mınýtynda Konstantın Býdeský Abzal Beısebekovty qapy qaldyryp, qaqpamyzǵa gol soǵyp ketti. Al 38-mınýtta Býdeský Rýmynııa quramasynyń ekinshi golyn saldy. Sóıtip, birinshi taım sońyna deıin esep ózgergen joq.
Rýmynııa men Qazaqstan teketiresiniń ekinshi taımyn bas jattyqtyrýshymyz Aleksandr Borodıýk oıynshy almastyrýmen bastady. Jalpy ekinshi taımda oıynǵa jańadan qosylǵan fýtbolshylar oınady desek qatelespeıtin shyǵarmyz. Shabýylshy Azat Nurǵalıevtiń ornyna Sergeı Hıjnıchenko shyqsa, Roman Murtazaevty Alekseı Shetkınmen almastyrdy. Oıynǵa jańadan qosylǵan fýtbolshylarymyz quramamyzdyń oıynyn jandandyra túskenin atap ótkenimiz jón. Degenmen, 73-mınýtta oıynǵa ekinshi taımda qosylǵan Klaýdıý Kesherıý esepti 3:0-ge jetkizdi. Aradan 10 mınýt ótkende oıynnyń ekinshi bóliginde alańǵa bizdiń qurama sapynan shyqqan Baýyrjan Turysbek Rýmynııaǵa soqqan jalǵyz golymyzdyń avtory atandy.
Eske sala keteıik, Qazaqstan quramasy kelesi kezdesýin 8 qazan kúni elordadaǵy "Astana Arena" stadıonynda ótkizedi.
Álı BITО́RE,
«Egemen Qazaqstan» –
Býharestten
Sýret avtory – Ilııas Omarov