Keshe ortalyq saılaý komıssııasynda memleket jáne qoǵam qaıratkerleri, saıası partııalardyń ókilderi, oblystardaǵy saılaý komıssııalarynyń músheleri qatystyrylǵan úlken keńes bolyp, onda shyǵyp qalǵan máslıhat depýtattarynyń ornyna 29 qazanda bolatyn saılaýǵa kandıdattar usyný men tirkeý qorytyndylary týraly aıtyldy. Sonymen qatar elektorattyq oqytýdy uıymdastyrý jónindegi qanatqaqty jobanyń qorytyndylary jáne 2018 jylǵa arnalǵan josparlar jóninde áńgime boldy.
Otyrysty Ortalyq saılaý komıssııasynyń (OSK) tóraǵasy Berik Imashev ashyp, júrgizip otyrdy. OSK tóraǵasy máslıhat depýtattarynda ózderiniń ókilettigin merziminen buryn toqtatý dınamıkasynyń ósýi kórinis bergenin aıtty. Bul máselege saıası partııalar nazar aýdarǵanyn qalaımyz, óıtkeni mundaı úrdis depýtattyq korpýsqa degen senimdi tómendetip, kandıdattardyń saılaýshylarǵa bergen ýádeleriniń oryndalmaýyna soqtyrady, dedi ol.
Birinshi másele boıynsha baıandamany OSK qyzmetin qamtamasyz etý bóliminiń meńgerýshisi Maqsatqan Anapın jasady. Onyń aıtýyna qaraǵanda, 29 qazanda elimizdiń 15 aımaǵyndaǵy 105 saılaý okrýginde shyǵyp qalǵan depýtattardyń ornyna jańa kandıdattardy saılaý bolady eken. Tek Astana qalalyq máslıhatynda ǵana shyǵyp qalǵandar bolmaǵandyqtan saılaý bolmaıdy. Sonyń ishinde 22 oblystyq, 19 qalalyq jáne 64 aýdandyq máslıhattarǵa jańa depýtattar saılanatyn bolady. Jańa saılaýda Aqtóbe oblysynda – 14, Pavlodar oblysynda – 13, Qostanaı oblysynda – 12, Almaty oblysynda – 11 úmitker daýysqa túsetin bolady. Bular – kandıdattar barynsha kóp túsetin aımaqtar, al Jambyl jáne Aqmola oblystyq máslıhattaryna saılanatyndar 2-3-ten ǵana.
Saılaý naýqanynyń barysynda 370 úmitker usynylyp, sonyń ishinde 93 úmitker oblystyq máslıhatqa, qalalyq máslıhattarǵa 72 jáne aýdandyq máslıhattarǵa 205 kandıdat tirkelgen. Tirkelgenderdiń 251-i, ıaǵnı 74,9 paıyzy erler, 84-i, ıaǵnı 25,1 paıyzy áıelder. Úmitkerlerdiń ortasha jasy 45-te bolǵan. Tirkelgen úmitkerlerdiń 85,4 paıyzynyń joǵary bilimi bar. Sonyń ishinde 98 adam muǵalim, 61 ınjener-tehnıkalyq qyzmetkerler, 37-si zańgerler jáne t.b.
Baıandamashynyń aıtýyna qaraǵanda, máslıhat depýtattarynyń óz ókilettikterin doǵarýynyń negizgi sebebi turǵyn mekenin aýystyrýda eken. Alaıda keıbir oblystarda osyndaı úrdisterdiń tym jıilep ketkendigi alańdatady. Máselen, bul jaǵdaı Pavlodar oblysynda basqa aımaqtarmen salystyrǵanda ótkirirek. Sondyqtan aýmaqtyq saılaý komıssııalary usynylǵan úmitkerlerdiń jaqyn ýaqyttarda turatyn mekenin aýystyryp, kóship ketpeıtindigine de nazar aýdarýy kerek degen oılar aıtyldy.
Sonymen qatar otyrysta máslıhat depýtattarynyń kýáligine engizilgen ózgerister bekitildi.
Jaqsybaı SAMRAT, «Egemen Qazaqstan»