Ońtústik Qazaqstan oblysyna jyl basynan beri 128 myń týrıst kelgen. Bul ótken jylmen salystyrǵanda 55 paıyzǵa kóp. Bul týraly OQO óńirlik kommýnıkasııalar qyzmetinde ótken baspasóz konferensııasynda oblystyq kásipkerlik, ındýstrıaldy-ınnovasııalyq damý jáne týrızm basqarmasynyń basshysy Batyrhan Qurmanseıit málim etti.
Onyń aıtýynsha, oblysta bıyl týrızm salasynyń qarqyndy damýy baıqalady. О́tken jylmen salystyrǵanda týrıstik nysandar sany 31 paıyzǵa ósip, 195-ti quraǵan. Al olarda 1,7 mlrd.teńgeniń kóleminde qyzmetter kórsetilip, qyzmetter kólemi 43 paıyzǵa jetken.
«Endi ishki týrızmdi damytýǵa barynsha kóńil aýdaryp jatyrmyz. Ońtústikke kelýshi týrısterge qolaıly jaǵdaı jasaý maqsatynda oblysta 1, 2 jáne 3 kúndik týrıstik marshrýttar ázirlengen. Atalǵan marshrýtqa 84 tarıhı-mádenı obektiler men tabıǵı oryndar engizildi. Jalpy óńirimizde 800-den astam tarıhı jáne mádenı eskertkishter ornalasqan. Osy rette, oblys týrızmin damytý maqsatynda birqatar mańyzdy jobalar júzege asyrylýda»,- dedi B.Qurmanseıit.
Basqarma basshysynyń málimdeýinshe, Shymkenttiń eski qalashyǵy aýmaǵynda ashyq aspan astyndaǵy murajaı ashý, Ábý Nasyr Ál-Farabı dúnıege kelgen Oqsyz qonysyn jáne Abylaı hannyń Ordasy ornalasqan Hanqorǵandy qalpyna keltirý, Qazyǵurt jáne Ordabasy aýdandarynda álemdik standartqa sáıkes servısi men týrıstik ınfraqurylymy bar brendke aınaldyrý, Qoja Ahmet Iаssaýı kesenesine keletin otandyq jáne sheteldik týrısterdiń aǵymyn eskere otyryp, onyń tarıhyn jáne aımaǵyn álemdik murajaılar úlgisinde aýdıo-vıdeo vızýalızasııalaý, orta ǵasyrda Otyrar kóne qalashyǵy men Arystanbap kesenesin baılanystyrǵan joldy qalpyna keltire otyryp, sol jol boıynda ulttyq qolóner sheberhanalaryn ornalastyrý josparlanýda.