Sheshennen sóz, sheberden iz qalady. Áýletimen óner qýǵan ustalardyń urpaǵy, ustaz, Qazaqstan jáne KSRO Sýretshiler jáne dızaınerler odaǵynyń múshesi, Qazaqstannyń eńbek sińirgen qaıratkeri, etnodızaıner Dárkembaı Shoqparulynyń ómiri men shyǵarmashylyǵy týraly baıandaıtyn «Usta» atty derekti fılm jaryqqa shyqty.
Osyǵan oraı Almaty qalasyndaǵy Ulttyq kitaphanada, Ermek Tursynovtyń kınoklýbynda Mádenıet jáne sport mınıstrliginiń tapsyrysy boıynsha Sh.Aımanov atyndaǵy «Qazaqfılm» AQ túsirgen derekti fılmniń tusaýkeseri ótti.
Altyn saýsaqty, aǵashtan túıin túıgen sheberdiń biregeı esimi qazaq ónerinde alabóten atalyp qana qoımaı, ultymyzdyń joıylyp bara jatqan dástúrli qoldanbaly ónerin qaıta jańǵyrtqan eńbegine áli talaı urpaqtyń tánti bolatyny sózsiz. Kúni búginge deıin birqatar kórkem, derekti fılmderdiń avtory bolyp úlgergen fılmniń rejısseri Mirǵalym Esirkepov keıipkerin kezdeısoq tańdamaǵan. Fılmniń «Usta» degen ataýynyń ózi tar zamannyń sheńberiniń ishinde júrse de qazaqtyń umytyla bastaǵan, qoldanystan qalyp bara jatqan qolónerine qanatty qııalymen jan bitirip, saqtap qalýǵa tyrysqan ultjandy ul Dárkembaı Shoqparuly ekenin aına-qatesiz tuspaldaıdy. Rejısserdiń shoqtyǵy bıik qolóner sheberleriniń qupııa syryn meńgergen Dárkembaı sekildi dara óner ıesiniń bolmysyn tereń biletin tanymy jańa týyndysynda jan-jaqty tanylady.
– Men Dárkembaı Shoqparulynyń tulǵalyq beınesin tereńinen tanyǵym keldi. Sondyqtan da osy fılmdi túsiremin dep sheshtim. Ol kisini zertteı kele, ol – aldyna qoıǵan maqsatyna jetý úshin taıǵanaqtamaıtyn, batyl ári aqjarqyn adam ekenin bildim. Onyń bar maqsaty – boıyndaǵy talantyn ıgerip kórsetý, ony damytý ǵana emes, sonymen birge ulttyq óner men dástúrdi shákirtterine, izbasar ustalarǵa úıretý edi. Keńes zamanynan beri sándik-qoldanbaly ónerine tıisti kóńil bólinbeı keledi, árdaıym beıneleý óneriniń jas salasy retinde ǵana qarastyrylady. Meniń birinshi mamandyǵym – qoldanbaly óner sýretshisi. Sondyqtan da, Dárkembaı ustanyń jumystary maǵan jaqyn, – deıdi rejısser Mirǵalym Esirkepov.
«Usta» derekti fılmi ótken jyldyń sońyna qaraı óndiriske jiberilgen. Fılmniń túsirilimderi Almaty oblysynyń Aqshı aýylynda ótken. Dárkembaı Shoqparuly ómiriniń sońyna deıin osy aýylda turǵan jáne óz sheberhanasyn ashqan. Aqshı aýylynda Dárkembaı Shoqparuly atyndaǵy qolóner mýzeıi ornalasqan. Mýzeıdi 2010 jyly sheberdiń uly ashqan. Sondaı-aq, túsirilimder Dárkembaı Shoqparuly týyp-ósken Eńbekshiqazaq aýdanyndaǵy Kazatkom aýylynda da ótti.
Mádenı is-sharaǵa Dárkembaı Shoqparulynyń týystary men jaqyndary, kózkórgen zamandastary men shákirtteri, fılmniń túsirý toby men «Qazaqfılm» kınostýdııasynyń ókilderi qatysty.
Aıgúl AHANBAIQYZY, «Egemen Qazaqstan»
ALMATY