«Nur Otan» partııasynyń Almaty qalalyq fılıalynyń konferens- zalynda Qazaqstannyń Aýǵan soǵysy ardagerleri uıymdary «Qazaqstan ardagerleri» qaýymdastyǵynyń 5-shi sezi jumysyn aıaqtady
Partııalyq nemese qoǵamdyq uıymdarda ótetin kádýilgi sezden bul jıynnyń basty aıyrmashylǵy sol, bas baıandamashy – Qaýymdastyq tóraǵalyǵyna aldyńǵy kúni kópshilik daýyspen qaıta saılanǵan QR Parlamenti Májilisiniń depýtaty Baqytbek Smaǵul óz sózin zal toly qaýymǵa rýh beretin jalyndy jyrymen bastady.
Armysyńdar baýyrlar!
Sender , sender otan úshin oqqa tostyń keýdeńdi,
О́rligińdi, erligińdi el kórdi.
Birge attanǵan baýyrlaryń jer jastandy, jerlendi
Jebeıdi olar árýaǵymen senderdi...
Budan 40 jyl buryn bolǵan qyrǵyndy eske salǵan óleń joldary sezd delegattaryn – aýǵan soǵysynyń maıdangerlerin oryndarynan tik turǵyzdy. Bir mınýttyq únsizdik sátinde azamattar keshegi qan maıdanda jat elde jan tapsyrǵan bozdaqtardy eske aldy. Aýǵan jerinde sheıit bolǵan qazaqstandyqtardyń sany sol kezdegi esepke alynǵan 761-men shektelmepti. Beıbit zamannyń ózinde qan soǵystan zardap shekkenderdiń dúnıeden ótkenderimen búgingi tańda 920-ǵa jetipti!
Soǵys ardagerleri seziniń Qazaqstannyń Tuńǵysh Prezıdenti – QR Qarýly Kúshteriniń Joǵarǵy Bas Qolbasshysy Nursultan Nazarbaevtyń «Egemen Qazaqstan» gazetinde jarııalanǵan «Bolashaqqa baǵdar: rýhanı jańǵyrý» maqalasynyń aıasynda ótýi de jaıdan-jaı emes. Búginde jalpy ulttyq jobaǵa aınalǵan baǵdarlamada tarıhymyz tereńde jatqan rýhy myqty halyq ekenimiz eske alynyp, el bolashaǵy jastardy ulttyq patrıotızmge laıyqty tárbıeleýdiń aıshyqty joldary anyq kórsetilgen. Sondyqtan da «Rýhanı jańǵyrýdyń» árbir tarmaǵyn basshylyqqa alyp sóz sóılegen sheshender – Qazaqstannyń Qorǵanys mınıstrliginiń, sondaı-aq basqa da kóptegen memlekettik quzyrly mekemeler men vedomstvolardyń ókilderi, almatylyq «Nur Otan» partııasynyń músheleri ómir mektebiniń ustazdary – aýǵandyq soǵystyń ardagerleriniń erlik isterine taǵzym etip, olardyń jastardyń patrıottyq tárbıesine ólsheýsiz úles qosyp keletini týraly keleli pikirlerin ortaǵa saldy. Barshanyń oı-tilekteri bir jerge toǵysyp, qazaqstandyq «aýǵandyqtardyń» aldaǵy isterine tabys tiledi.
Sezd delegaty, aýǵan soǵysynyń tarıhyna erligi óshpesteı etip jazylǵan ataqty «qara maıor» – Borıs Kerimbaev jaýyngerlerin maıdan shebine alyp kirgende 32 jasta eken.
–Sodan beri arada 40 jyl ótipti, – dedi qarlyǵyńqy daýyspen sóz bastaǵan komandır. –Keshegi 17-18 jasynda qan keshken jaýynger búgingi jastarǵa basynan keshkenin boıamasyz aıtyp berse jetip jatyr, áskerı-patrıotızm degen sol emes pe?! Maıdanger esteliginiń máni de, qýaty da sonda. О́kinishke oraı, ol dástúr umytylyp barady... Úkimet tarapynan áleýmettik qoldaý bar. Meniń zeınetaqym ózimniń dári-dármegime jetedi. Aýyldaǵy maıdangerlerge she? Olardyń zeınetaqysy menikindeı emes, múldem az. Keıde kóńilim alań bolyp, hal-jaǵdaılaryn suraıtynym bar, sondaǵy estıtinim: «Aǵa, qaıdaǵy daǵdarysty aıtyp tursyz, –dep bári tańdanady. –Un bar – nan pisiremiz, qoı bar – et jaımiz» deıdi. Solardyń kóbisi ózine tıisti áleýmettik jeńildikterdi de almaıdy. Sezd delegattaryna qulaqqaǵys, aýyldaǵy «aýǵandyqtar» umyt qalmasyn!
Qaýymdastyq tóraǵasy Baqytbek Smaǵul Qazaqstannyń ár buryshynan at aryltyp jıynǵa ádeıi kelgen delegattarǵa, birqatar qurmetti qonaqtarǵa Alǵys hattar men Marapattaýlar tapsyrdy. Mártebeli jıyn ústinde Qazaqstannyń qas batyry, bar bolmysymen ulttyq patrıotızmniń naǵyz úlgisi atanǵan Baýyrjan Momyshulynyń da esimi atalmaı qalmady. El gazeti «Egemen Qazaqstannyń» qazaqstandyq «aýǵandyqtardy» aqparattyq qoldaý kórsetip keletinine úlken rızashylyq sezimin bildirgen tóraǵa – Májilis depýtaty Baqytbek Smaǵul «Gazet ujymynyń basshysy Darhan Qýandyquly Qydyráli belgili ǵalym Mekemtas Myrzahmetov aǵamyzben birlesip bizdiń rýhanı kósemimiz – qazaq halqynyń birtýar uly, Keńes Odaǵynyń Batyry Baýyrjan Momyshulynyń 30 tomdyǵyn shyǵarýǵa tikeleı at salysty. Biz muny eshýaqytta umytpaımyz. Sol sebepti de, Darhan Qydyrálini barsha «aýǵandyqtar» atynan «Baýyrjan Momyshuly» Namys tós belgisimen marapattaımyz» dedi.
Delegattar bıik minberden aıtylǵan árbir sózge dý qol shapalaqtap qurmet kórsetti. Sezde qazaqstandyq barlyq «aýǵandyq» «Rýhanı jańǵyrý» aıasynda elimizdiń gúldenýi úshin, jasóspirimderdi Otandyq patrıotızmge tárbıleýge aıanbaı atsalysa beretini týraly aıtyp, soǵan oraı tıisti qarar qabyldady.
Igilikti shara almatylyq óner sheberleriniń konsertine ulasty.
Talǵat SÚIINBAI,
«Egemen Qazaqstan»
Sýretterdi túsirgen
Nurmanbet QIZATULY
ALMATY.