Qurylǵanyna shırek ǵasyr tolǵan Túpqaraǵan aýdanynyń ortalyǵy – Fort-Shevchenko qalasy. Aýdan quramyna atalmysh qaladan basqa, Baýtın, Qyzylózen, Taýshyq, Aqshuqyr aýyldary jáne Saıyn Shapaǵatov aýyldyq okrýgteri kiredi.
Sońǵy 10 jylda aýdannyń áleýmettik-ekonomıkalyq damýy jyldan jylǵa joǵarylap keledi. Barlyq eldimekender kógildir otynmen qamtylǵan. Búgingi tańda aýyz sý jáne káriz sý qubyry qurylystary júrgizilýde. Barlyq eldimekende mektep, balabaqsha, mádenıet úıleri jumys isteıdi.
Búgin oblys ákimi aýdan halqyn mereıli merekemen quttyqtady. Ol aldymen Fort-Shevchenko qalasyndaǵy «Mádenıet úıi» memlekettik kásiporny jumysymen tanysty. Ortalyqtyń syıymdylyǵy 255 adam. Munda 37 adam jumys isteıdi.
-Jalpy aýdannyń ósý qarqyny jaman emes. Sońǵy bir jyldyń ishinde 70-ke jýyq arnaıy shaǵyn jáne orta bıznes oryndary, 100-den asa jańa jumys oryny ashyldy. Bul bir aýdan úshin az kórsetkish emes. Munyń barlyǵy oblysymyzǵa tikeleı áserin tıgizedi. Orta jáne shaǵyn bıznestiń aınalasynda kóptegen jańa jumys oryndaryn ashýymyz kerek. Osyǵan baılanysty aýdan ákimine de tıisti tapsyrma berildi. Ol meniń tapsyrmam emes, ol Elbasynyń aldymyzǵa qoıyp otyrǵan tapsyrmalary, dedi Mańǵystaý oblysynyń ákimi Eraly Toǵjanov.
Merekelik saltanatty jıynnan keıin óńir basshysy «Daryn» aýdandyq qosymsha bilim ortalyǵyna bardy. Bilim berý mekemesi 2011 jyly ashylǵan. Qazir munda 45 qyzmetshi eńbek etedi. Ortalyqtyń syıymdylyǵy 62 oryndyq. Bilim ordasynyń maqsaty - oqýshylar men jasóspirimderdiń sabaqtan tys ýaqytyn tıimdi paıdalaný. 2017-2018 jyldarǵa deıin 600 balany qosymsha bilimmen qamtýdy josparlanyp otyr.
Sonymen qatar, qonaqtarǵa «Bolashaqqa baǵdar: rýhanı jańǵyrý» maqalasy aıasynda Túpqaraǵan aýdandyq jobalyq ofısi tanystyryldy. Qazir aýdanda 4 kishi baǵdarlamadan turatyn «Rýhanı jańǵyrý» baǵdarlamasyn ilgeriletý jáne úılestirý boıynsha aýdandyq jumys toby, Jobalyq top pen hatshylyq quramy bekitildi. Atalǵan topqa óńirdiń zııaly qaýym ókilderi, memlekettik organ basshylary, úkimettik emes uıymdar, ardagerler, BAQ ókilderi engizildi. Sondaı-aq, Túpqaraǵan aýdany boıynsha «Rýhanı jańǵyrý» aýdandyq jobalyq ofısi qurylyp, búgingi kúni atalǵan baǵyttaǵy jumystardy júrgizýde.
Aýdan ortalyǵynda merekege arnalǵan sherý uıymdastyryldy. Oǵan aýdan ardagerleri, memlekettik ákimshilik qyzmetshiler, quqyq qorǵaý salasynda ulttyq qaýipsizdik komıteti, aýdandyq prokýratýra, aýdandyq sot, ishki ister bóliminiń qyzmetkerleri, aýrýhana, bilim bóliminiń qyzmetkerleri, aýdannyń qýatyn beıneleıtin óndiristik mekemeler, sportshylar, aýdandyq «Tulpar» áskerı-patrıottyq klýby, aýdannyń belsendi jastary jáne mektep oqýshylary qatysty. Sherý sońy konserttik baǵdarlamamaen jalǵasty. Merekelik konsertten keıin at shabys alańynda «Alaman báıge» uıymdastyryldy.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy