Qazaqstan Respýblıkasynyń Syrtqy ister mınıstriniń orynbasary Aqylbek Kamaldınov bastaǵan qazaqstandyq delegasııa 2017 jylǵy 16 qazanda Dýshanbe qalasynda ótken Ortalyq Azııa elderi men Ázerbaıjanmen arab ekonomıkalyq yntymaqtastyǵy Forýmynyń ekinshi otyrysyna qatysty, dep habarlaıdy QR SIM baspasóz qyzmeti.
Forýmǵa Arab memleketteri lıgasynyń Syrtqy ister mınıstrleri keńesiniń tóraǵasy ári Djıbýtıdiń Syrtqy ister mınıstri Mahmud Álı Iýsýf jáne Arab memleketteri lıgasynyń Bas hatshysy Ahmad Ábilgeıt qatysty. Forým jumysyna Túrikmenstan baıqaýshy el retinde qatysty.
Forýmnyń ashylýy rásiminde sóz sóılegen Tájikstan Prezıdenti Emomalı Rahmon damyǵan arab elderdiń qarajaty esebinen damyp bara jatqan musylman elderine járdem berý Qor qurýdy usyndy.
A.Kamaldınov óz sózinde forýmnyń ekonomıkalyq áleýetin, onyń ishinde Qazaqstan Respýblıkasynyń halyqaralyq bastamalaryn da barshanyń paıdasyna iske asyrý úshin barynsha paıdalanýǵa shaqyrdy.
Forým aıasynda arab elderi jáne Ortalyq Azııa men Ázerbaıjan arasyndaǵy ekonomıkalyq yntymaqtastyqty damytý máselelermen qosa óńirdegi beıbitshilik pen qaýipsizdik máseleleri de keńinen talqylandy.
Is-shara bitisimen qabyldanǵan Dýshanbe deklarasııasynda forým qatysýshylary onyń bul format sheńberinde yqpaldastyqty odan ári damytýǵa baǵyshtalǵan qazaqstan tarapynyń halyqaralyq bastamalaryna qoldaý bildirildi. Forým qarsańynda, ıaǵnı 15 qazan kúni Dýshanbede is-sharaǵa qatysýshy elderdiń Joǵary laýazymdy tulǵalardyń bosqosýy oryn aldy.
Ortalyq Azııa elderi men Ázerbaıjanmen arab ekonomıkalyq yntymaqtastyǵy forýmy Saýd Arabııasy Koroldiginiń bastamasymen qurylǵan jıyn. 2014 jylǵy mamyr aıynda Er-Rııad qalasynda qazaqstan tarapynyń qatysýymen ótken forýmnyń tuńǵysh otyrysynyń qorytyndylary boıynsha Rııad deklarasııasy qabyldanyp, Arab memleketteri lıgasy men Ortalyq Azııa elderi men Ázerbaıjan arasyndaǵy yntymaqtastyq memorandýmǵa qol qoıyldy.
Dýshanbede ótken forým jumysyna 28 eldiń, olardyń ishinde Arab Memleketteri Lıgasynyń 21 múshe eldiń jáne Ortalyq Azııa men Ázerbaıjan memleketteriniń delegasııalary qatysty.