Vena qalasynda EQYU-nyń jyl saıynǵy Ekonomıka jáne qorshaǵan orta ólshemi boıynsha mindetterdi oryndaý jınalysy ótti. Is-sharanyń sessııalary barysynda úkimet, jeke sektor, azamattyq qoǵam ókilderi, sondaı-aq halyqaralyq sarapshylar qorshaǵan orta táýekelderin azaıtý, sý máselelerinde úzdik tájirıbelerdiń oryndalýyn qadaǵalaý, qorshaǵan orta máselelerine qatysty qoǵamnyń bilimin arttyrý, energetıka tıimdiligi men jańǵyrmaly energetıka, qorshaǵan orta salasynda sybaılas jemqorlyqpen kúres jáne jaqsy basqarý jáne BUU-nyń Turaqty damý maqsattaryn talqylady.
EQYU-nyń tóraǵasy Aýstrııa tarapy atalǵan is-shara jańasha oılaýǵa jáne qorshaǵan orta salasyndaǵy máselelerdi birlese sheshýge úles qosatynyn aıtyp, «jasyl» ekonomıka máselelerine asa mán beretinin málimdedi. Osy oraıda EQYU Ekonomıka jáne ekologııa komıtetindegi Qazaqstannyń tóraǵalyǵyn erekshe atap ótti jáne Uıymnyń Ekonomıkalyq jáne ekologııalyq forýmynyń (EEF) ekinshi daıyndyq jınalysy bıyl maýsymda Astanada ótken EKSPO-2017 halyqaralyq mamandandyrylǵan kórmesi sheńberinde uıymdastyrylýynyń mańyzdylyǵyna nazar aýdardy.
EQYU Ekonomıka jáne ekologııa komıtetiniń tóraǵasy, Qazaqstan Respýblıkasynyń EQYU-daǵy Turaqty ókili Qaırat Sarybaı Qazaqstannyń qorshaǵan orta salasynda «Qazaqstan-2050» Strategııasy, «Úshinshi jańǵyrý» jáne «Jasyl kópir» halyqaralyq baǵdarlamalary sheńberinde júrgizilip jatqan jumys týraly egjeı-tegjeıli aqparat usyndy. Sondaı-aq EKSPO ınfraqurylymy negizinde Astanada qurylatyn «Bolashaqtyń energııasy» jasyl tehnologııalar jáne ınvestısııalyq jobalar halyqaralyq ortalyǵynyń jumysyna EQYU úles qosa alatynyn atap ótti.
Sharaǵa Qazaqstan ekologııalyq uıymdarynyń tóraıymy Aıgúl Soloveva men «Halyqaralyq araldy qutqarý qory» sý resýrstary departamentiniń jetekshisi Ámirhan Kenshimov qatysyp, jınalys barysynda kóterilgen ózekti máseleler boıynsha oılarymen bólisti.
Atap aıtqanda, Á.Kenshimov sý máselelerine arnalǵan sessııa barysynda halyqaralyq uıymdarmen, onyń ishinde EQYU-men birlese Aral teńizin qutqarý sheńberinde júzege asyrylǵan jobalar týraly habardar etti jáne Qazaqstanda sý sharýashylyǵy mamandaryn daıarlaý týraly maǵlumat usyndy.
A.Soloveva energetıka tıimdiligi men jańǵyrmaly energetıka taqyrybyna arnalǵan sessııada spıker retinde Qazaqstan úkimeti men qoǵamdyq birlestikterdiń atalǵan saladaǵy jumysy týraly tolymdy aqparat berdi.
Italııanyń EQYU-daǵy Turaqty ókili Alessandro Azonı qorytyndy sessııada óz eliniń 2018 jyly uıymǵa tóraǵalyǵy barysynda Germanııanyń 2016 jylǵy jáne Aýstrııanyń ústimizdegi jylǵy tóraǵalyqtarynyń ekinshi ólshemdegi basymdyqtaryn jalǵastyratynyn jáne EEF-tiń birinshi daıyndyq jınalysyn sıfrly pishimge kóshirý, ekinshi daıyndyq jınalysyn adam kapıtalyn damytý men jyl saıynǵy Praga forýmyn jaqsy basqarý jáne jaýapty basshylyq taqyrybyna arnaıtynyn málimdedi. Sonymen qatar Italııa tóraǵalyǵy barysynda bıznes-konferensııa josparlanǵanyn atap ótti.
Aıta keteıik, aldaǵy 7-8 jeltoqsanda Venada ótetin EQYU Mınıstrler keńesiniń nátıjesi retinde EQYU Aýstrııa tóraǵalyǵy komıtettegi Qazaqstan tóraǵalyǵymen birlese ekonomıka jáne qorshaǵan orta boıynsha sheshim jobalaryn qabyldaýdy josparlaýda.
«Egemen-aqparat»