«Elim meniń» koalısııasynyń músheleri erkin pikir almasty
Oral qalasynda «Jas Otan» Jastar qanaty Batys Qazaqstan oblystyq fılıalynyń uıymdastyrýymen «Erkin pikir» dıskýssııalyq klýbynyń kezekti otyrysy ótti.
Erkin alańǵa oblystaǵy til salasy mamandary, jýrnalıster men jastar uıymdarynyń ókilderi, sonymen qatar «Elim meniń» koalısııasynyń músheleri qatysty.
«Elbasynyń bıyl jarııalaǵan baǵdarlamasy – el damýynyń tutas bir kezeńinde basshylyqqa alatyn tujyrym, ult bolashaǵyna degen senimdi kúsheıte túsetin tarıhı qujat. Latynǵa kóshýdiń ýaqyty týdy. Mańyzdylyǵy, qajettiligi jaǵynan da, tildiń bolashaǵy úshin de biregeı mindet. Ulttyq álipbı qoǵamda úlken qyzyǵýshylyq týdyrdy, óıtkeni álipbı taqyryby ult zııalylarynyń kópten kútken áńgimesi edi,» dedi dıskýssııalyq klýbtyń basty qonaǵy – Halyqaralyq «Qazaq tili» qoǵamy Batys Qazaqstan oblystyq fılıalynyń tóraǵasy Bolat Jeksenǵalıev.
Otyrys qorytyndysy boıynsha áleýmettik jelilerdegi top ataýlary men qoldanýshy ataýlaryn latyn áripterine aýystyrý, oflaın rejımde qyzmet etetin yńǵaıly konverter oılap tabý, jas til mamandarynyń usynysymen jastar men úlken toptardy oqytatyn arnaıy keshendi kýrstar júrgizý bastamasy kóterildi.
Qazbek QUTTYMURATULY,
«Egemen Qazaqstan»