«Qazaqstan temir joly» UK» AQ-qa Úkimet tapsyrmasy boıynsha aıyna mıllıon tonna astyq tasymaldaý júktelgen bolatyn. Bul mejeni temirjolshylar qazan aıynda 193,8 myń tonnaǵa asyra oryndaǵan.
«Qazaqstan temir joly» UK» AQ fılıaly – Tasymaldaý úderisi jónindegi dıreksııanyń dırektory Ermek Tólegenovtiń aıtýynsha, qazannyń 31-ine deıin barlyǵy 1 mıllıon 193,8 myń tonna astyq tasymaldanǵan. Onyń 601,7 myń tonnasy elimiz aýmaǵyndaǵy tutynýshylarǵa jetkizilse, 592,1 myń tonnasy TMD jáne Baltyq jaǵalaýy sekildi taıaý jáne alys shetelderge jiberilgen.
Astyq tasymaldaýǵa arnalǵan vagondardyń jetispeýshiliginen el ishindegi tasymalǵa jabyq jáne ashyq vagondar da paıdalanylýda.
Ulttyq kompanııa qazannan jeltoqsanǵa deıin aıyna mıllıon tonna astyq tasymaldaýdy josparlap otyr. Osyǵan oraı ár kúngi júk tıeýdiń kestesi jasalǵan.
Qyrkúıek aıynan beri «Azyq-túlik kelisim-shart korporasııasy» AQ memlekettik azyq túlik qoryndaǵy 500 myń tonna astyqty tıisti elevatorlarǵa ornalastyrýda. Qyrkúıek aıynda 231 myń tonna astyq tasymaldansa, qazannyń 27-sine deıin 142 myń tonna bıdaı tıisti jerlerge jetkizilgen. Vagondar «Azyq-túlik kelisim-shart korporasııasy» AQ-tyń tapsyrysyna baılanysty der kezinde berilýde.
Qarasha aıynda tapsyrys boıynsha bir mıllıon tonna astyq tasymaldaý kerek bolsa, bul ótken jyldyń sáıkes merzimimen salystyrǵanda, edáýir joǵary kórsetkish. Ulttyq kompanııa qarashada eksportqa shyǵatyn astyq kólemin ulǵaıta túspek. Qazirdiń ózinde astyq jóneltýshilerden qarasha aıyna eksportqa 820 myń tonna astyq shyǵarý jóninde tapsyrys tússe, el ishinde 120 myń tonna tasymaldanady dep kútilýde.
Ábdirahman QYDYRBEK.