Búgin saǵat 13:30 shamasynda Kóktýma eldi mekeni mańynda 5 jeńil kóliktiń qatysýymen jol-kólik oqıǵasy tirkeldi. Apattan alty adam túrli dárejede jaraqat alyp, Alakól aýdandyq aýrýhanasyna jetkizildi.
«QazAvtoJol» baspasóz qyzmetiniń málimetinshe, oqıǵa kezinde jol ýchaskesi qolaısyz aýa raıyna baılanysty jabyq bolǵan. Shekteý 13 aqpanda saǵat 12:00-de engizilip, sınoptıkter boljamyna sáıkes 17 aqpan saǵat 09:00-de ashylýy josparlanǵan edi.
Aldyn ala málimet boıynsha, kólikter bir baǵytta qozǵalǵan kezinde soqtyǵysqan. Apatqa qatysýshylar polısııa beketterin elemeı, jabyq joldyń ortasyna shyǵyp ketken.
Sonymen qatar, qutqarý qyzmetteri jolda qar qursaýynda qalǵan 12 avtokólikti shyǵardy jáne 9 adamdy qaýipsiz jerge jetkizdi.
Eldegi qaı joldar ashyq, qaısysy jabyq?