Qazaqstandyq daryndy oqýshylardyń jasaǵan jobalary óndiriste qoldanysqa engiziletin bolady. «Qazaqstan 2050» jalpyulttyq qozǵalysy tórt aı boıy uıymdastyrǵan olımpıada osyndaı nátıjege qol jetkizip otyr.
«Qazaqstan 2050» jalpyulttyq qozǵalysy bıyl shildeden qazan aıyna deıin Qazaqstannyń barlyq aımaǵyndaǵy mektepterden «Jasyl energetıka», «IT», «Modeldeý jáne robototehnıka», «Turmysqa paıdaly ónertabystar» taqyryptary boıynsha oqýshylardyń jobalaryn qabyldaǵan bolatyn. Kelip túsken 200-ge jýyq jobanyń ishinen 20 jobany sarapshylar toby iriktep aldy.
Osy 20 joba erteń Nazarbaev ýnıversıtetiniń kınozalynda kópshiliktiń qatysýymen qazylar alqasynyń aldynda qorǵalady. Eń úzdik 10 jobaǵa arnaıy mentorlar bekitilip, joba jalǵasty damytylady jáne ony halyq tutynatyn taýarǵa aınaldyrý joldary qarastyrylady. Negizgi demeýshilikti bekitilgen mentorlar jasaıdy. Mentorlardyń oqýshylarmen qalaı jumys jasap jatqandyǵyn baqylaý úshin uıymdastyrýshylar otandyq telearnadan arnaıy baǵdarlama ashyp, kelesi jyldan bastap turaqty túrde kórsetip otyrmaq. Joba jeńimpazdaryna oqý granttarymen qosa baǵaly syılyqtar da tabystalady.
Aıta keteıik, elimizde oqýshylardyń jobalaryn óndiriske qosýǵa arnalǵan olımpıada alǵash ret ótip otyr. Olımpıadaǵa «Samruk-Kazyna Trust» áleýmettik jobalardy damytý qory, QR Bilim jáne ǵylym mınıstrligi, respýblıkalyq «Daryn» ortalyǵy, Nazarbaev ýnıverısteti, Eýrazııa tehnologııalyq ýnıversıteti, «Bilim Media Group» qory qoldaý kórsetti.