Apparattyq keńeste elorda ákimi Áset Isekeshev jańa kadrlyq taǵaıyndaý týraly málimdedi, dep habarlaıdy Astana ákimdiginiń medıa ortalyǵy.
Áset Isekeshev qalanyń energokesheniniń damýyna úlesin qosqany úshin «Astanaenergoservıs» AQ-nyń basqarma tóraǵasy qyzmetinen óz erkimen bosatýdy suraǵan Ermek Alımovke alǵysyn bildirdi.
«Atap ótý kerek, osy jyly energokeshendi damytýdyń úsh jyldyq strategııasy ázirlenip, engizildi. Onyń aıasynda tıimdiliktiń negizgi kórsetkishterin (KPI) qoldaný jumysy bastaý aldy.
Energokeshendegi bıznes prosesterdi ashyqtyqpen qamtamasyz etý boıynsha biraz jumystar atqaryldy. Osy jumystardyń nátıjesinde konkýrstyq únemdeý, kassalyq alshaqtyqtyń tómendeýi júzege asty. 2016 jyldyń qorytyndysy boıynsha 1,6 mlrd teńge kóleminde kiris tústi», - dep málimdedi ákim.
«Astanaenergoservıs» AQ-nyń jańa basqarma tóraǵasynyń qyzmetine Ardaq Tıes taǵaıyndaldy. Ol ártúrli jyldary QR tabıǵı monopolııalardy retteý agenttigi tóraǵasynyń orynbasary, Qazaqstan damý banki tóraǵasynyń orynbasary, «Astana-Energııa» AQ tóraǵasynyń orynbasary sııaqty jaýapty qyzmetterdi atqarǵan bolatyn.
Astana ákimi «Astanaenergoservıs» AQ-nyń jańa jetekshisine sáttilik tilep, KPI engizý, qaladaǵy energokeshenniń senimdiligi men tıimdiligin joǵarylatý jumysyn júrgizýdi jalǵastyrýdy, sondaı-aq, qysqy ýaqytta jylytý kezeńine qatysty máselelerge erekshe kóńil bólýdi tapsyrdy.