Búgin Premer-Mınıstr Baqytjan Saǵyntaevtyń tóraǵalyǵymen ótken Úkimet otyrysynda aýyl sharýashylyǵyn memlekettik qoldaýdy jetildirý jónindegi sharalar, sondaı-aq elektrondy saýda-sattyqty damytý máseleleri, densaýlyq saqtaý salasyn sıfrlandyrý jaıy qaraldy.
Jıynda aýyl sharýashylyǵyn memlekettik qoldaýdy odan ári jetildirý maqsatynda qabyldanyp jatqan negizgi sharalar týraly Aýyl sharýashylyǵy birinshi vıse-mınıstri Qaırat Aıtýǵanov baıandady. Vıse-mınıstrdiń málimdeýinshe, agroónerkásip keshenin memlekettik qoldaýdy jetildirý maqsatynda, sondaı-aq 2017-2021 jyldarǵa arnalǵan AО́K-ti damytý memlekettik baǵdarlamasyn iske asyrý aıasynda aýyl sharýashylyǵynyń basym baǵyttaryn damytý jáne AО́K-ke memlekettik qoldaýdy jetildirý kartalary ázirlengen. Aýyl sharýashylyǵy kooperasııasyn damytý, agrarlyq qaıta óńdeý, AО́K-ti qarqyndy tehnıkalyq qaıta jabdyqtaý, tuqym sharýashylyǵy, ósimdikterdi qorǵaý, agrohımııa, mal azyǵy óndirisi, kóterme-úlestirý ortalyqtary, egindikterdi ulǵaıtý, otarly qoı sharýashylyǵyn damytý boıynsha on karta qabyldanǵan. Al agrarlyq ǵylymdy damytý, sıyr eti óndirisi, sýbsıdııalaýdan jeńildikti nesıelendirýge kóshý arqyly memlekettik qoldaý sharalarynyń tıimdiligin arttyrý kartalary ázirleý satysynda.
Aýyl sharýashylyǵyn memlekettik qoldaý máselesi boıynsha jıynda budan ári «Atameken» UKP agroónerkásiptik keshen komıtetiniń tóraǵasy Ivan Saýer, Qazaqstan mashına jasaýshylar odaǵynyń tóraǵasy Meıram Pishembaev, S.Seıfýllın atyndaǵy Qazaq agrotehnıkalyq ýnıversıtetiniń rektory Aqylbek Kúrishbaev, Qaraǵandy oblysy fermerler odaǵynyń tóraǵasy Igor Jabıak, Jambyl oblysynyń ákimi Kárim Kókirekbaev, Aqmola oblysynyń ákimi Málik Myrzalın sóz sóıledi.
Qorytyndysynda Premer-Mınıstr Baqytjan Saǵyntaev birqatar naqty tapsyrmalar berdi. Birinshiden, Aýyl sharýashylyǵy mınıstrligine ákimdiktermen birlesip, aýylsharýashylyq ónimin shyǵarýdan bastap ony syrtqy naryqtarǵa eksporttaýǵa deıin tıimdi tizbek qurý. Ekinshi, Aýyl sharýashylyǵy mınıstrligine Bilim jáne ǵylym mınıstrligimen birlesip, aýylda mindetti túrde eńbekpen qamtamasyz etý shartymen, aýyl jastaryna beriletin granttardyń sanyn ulǵaıtý máselesin pysyqtaý. Úshinshi, Aýyl sharýashylyǵy mınıstrligine ákimdiktermen birlesip, óńirlerdiń mamandanýyn eskere otyryp, aýylsharýashylyq ónimderin sýbsıdııalaý tetigine egjeı-tegjeıli taldaý jasaý, sondaı-aq usynylǵan barlyq sharalardy 2021 jylǵa deıingi AО́K-ti damytý memlekettik baǵdarlamasyna biriktirý máselesin pysyqtaý tapsyryldy.
Úkimet otyrysynda qaralǵan kelesi másele boıynsha negizgi baıandamashy Ulttyq ekonomıka birinshi vıse-mınıstri Rýslan Dálenov elektrondy kommersııany tıimdi damytý maqsatynda Elektrondy saýda-sattyqty damytý boıynsha 2018-2020 jyldarǵa arnalǵan jol kartasy ázirlengenin jáne bekitilgenin atap ótti. «Internet-dúken» túsinigin, sondaı-aq satýshylar men deldaldardyń ınternet-dúkender qurý máselelerin reglamentteıtin normalardy qarastyratyn «Saýda qyzmetin retteý týraly» zańǵa túzetýler jasalǵanyn, sondaı-aq mobıldi tólemderdiń jeńildetilgen tetigin engizýdi yntalandyrý, mobıldi tólemderge komıssııany tómendetý boıynsha usynystar, elektrondy shot-faktýrany paıdalanýǵa tolyq kóshýdi qamtamasyz etý máseleleri pysyqtalyp jatqanyn jetkizdi. Elektrondy kommersııany damytý boıynsha qabyldanǵan sharalar týraly budan ári Aqparat jáne kommýnıkasııalar mınıstri Dáýren Abaev, Qarjy mınıstri Baqyt Sultanov, «Qazposhta» AQ basqarma tóraǵasy Sáken Sársenov baıandady.
Máseleni talqylaý qorytyndysy boıynsha Premer-Mınıstr elektrondy saýda-sattyqty damytý úshin elimizde biraz jumys atqarylyp jatqanyn, salyq jeńildikteri beriletinin, sáıkes jol kartasy ázirlengenin, alaıda sonymen birge tutynýshylardyń quqyqtaryn qorǵaý týraly umytpaý kerek ekenin atap ótti. Osyǵan baılanysty Ulttyq ekonomıka mınıstrligine múddeli memlekettik organdarmen jáne uıymdarmen birge tutynýshylardyń quqyqtaryn qorǵaý jáne bıznesti onlaın saýda-sattyqqa yntalandyrý boıynsha tásilderdi qarastyratyn zańnamany jetildirý sharalaryn qabyldaý tapsyryldy. Investısııalar jáne damý, Ulttyq ekonomıka mınıstrlikterine elektrondy kommersııanyń jedeldetilgen damýyna baǵyttalǵan ózindik óndiris taýarlary, jumystar jáne qyzmet kórsetýler tizimin keńeıtý máselelerin pysyqtaý tapsyryldy.
Densaýlyq saqtaý mınıstri Eljan Birtanov óz kezeginde densaýlyq saqtaý salasyn sıfrlandyrý boıynsha júrgizilip jatqan jumystar jaıynda aıtyp berdi. Eljan Birtanovtyń aıtýynsha, densaýlyq saqtaý salasyn sıfrlandyrý Prezıdenttiń «Qazaqstannyń úshinshi jańǵyrýy: jahandyq básekege qabilettilik» Joldaýyn iske asyrý aıasynda «Densaýlyq saqtaý júıesin jańǵyrtý» jobasy boıynsha jeke bastama retinde iske asyrylýda, sonymen qatar «Sıfrly Qazaqstan» memlekettik baǵdarlamasymen tolyq sáıkestendirilgen.
«Densaýlyq saqtaý júıesin sıfrlandyrýdyń 2017-2018 jyldarǵa arnalǵan jol kartasy ázirlendi. Jyl sońyna deıin Biryńǵaı ıntegrasııalyq platformany qanatqaqty engizý kózdelgen, onyń aıasynda Qazaqstannyń árbir azamatynyń jeke uıashyǵy – densaýlyǵynyń elektrondy pasporty bolady. Sondaı-aq jekelegen qyzmetterdiń jumysy avtomattandyrylady. Olar: medısınalyq saqtandyrý qory, qoǵamdyq densaýlyq saqtaý men dári-dármekpen qamtamasyz etý salasy.
«Densaýlyq saqtaý mınıstrligi men IBM kompanııasynyń arasynda yntymaqtastyq týraly memorandýmǵa qol qoıyldy, onyń sheńberinde «Watson for oncology» – densaýlyq saqtaý salasyna jasandy ıntellektini qanatqaqty engizý josparlanǵan. Qazirgi tańda joǵaryda atalǵan memorandým aıasynda qanatqaqty jobany júzege asyrý boıynsha jol kartasy ázirlenýde», dedi mınıstr.
E.Birtanovtyń aıtýynsha, densaýlyq saqtaý salasyn sıfrlandyrý arqyly medısına qyzmetkerleriniń eńbek ónimdiligin ulǵaıtyp, halyqtyń medısınalyq qyzmetterge qanaǵattaný deńgeıin arttyrý kózdelgen.
Úkimet otyrysynyń sońynda aldaǵy jyly Phenchhan qalasynda (Ońtústik Koreıa) ótetin HHIII qysqy Olımpıada oıyndaryna daıyndyq barysy da pysyqtaldy. 2017 jyly ótetin qysqy Olımpıada oıyndarynda álemniń 80-nen astam elinen 5000-nan astam sportshy men resmı tulǵa qatysady dep josparlanǵan. 15 sport túri boıynsha 102 medal jıyntyǵy oınatylatyn bolady. Qazaqstandyq sport delegasııasy 9 sport túrine qatysýdy josparlap otyr: bıatlon, mánerlep syrǵanaý, taý shańǵy sporty, short-trek, konkımen júgirý sporty, shana sporty, shańǵy jarysy, shańǵymen tramplınnen sekirý, frıstaıl (akrobatıka, mogýl).
Qazirgi tańda Qazaqstanda eki sport túri boıynsha 13 lısenzııa bar. Onyń 10-y bıatlonnan, 3-i mánerlep syrǵanaýdan. 2017-2018 maýsymda lısenzııaǵa ıe bolý úshin qysqy sport túrleri boıynsha Qazaqstannyń qurama komandasy halyqaralyq sporttyq kúntizbege sáıkes halyqaralyq biliktilik jarystaryna qatysady.
«Elimizdiń Olımpıada quramasyn qalyptastyrý atletterdiń dene daıyndyǵynyń deńgeıin, psıhologııalyq turaqtylyǵyn eskere otyryp, qorytyndy irikteý kezeńi men dopıngke qarsy baqylaý nátıjeleri boıynsha kelesi jyldyń qańtaryna deıin jalǵasady», dedi elimizdiń Mádenıet jáne sport mınıstri Arystanbek Muhamedıuly.
Máseleni talqylaý qorytyndysynda Úkimet basshysy B.Saǵyntaev Mádenıet jáne sport mınıstrliginiń basshylyǵyna qysqy Olımpıada oıyndaryna daıyndyqty sapaly júrgizýdi tapsyrdy.
Dınara BITIK, «Egemen Qazaqstan»