Atyraýda Nurlan Balǵymbaevty eske alý keshi ótti

Keshti jazýshy-dramatýrg Raqymjan Otarbaev alǵy sóz­ben ashyp, Nurlan О́tepuly­nyń elimizdiń táýelsizdigine, saıası-ekonomıkalyq damýyna qosqan úlesin, munaı ónerkásibiniń órken­deýine sińirgen eńbegi týraly aıtyp ótti. Ásirese onyń adamı qyrlaryn sıpat­tap, eldik máselelerdi sheshýdegi taban­dylyǵyn, utymdy pikir­lerin, iskerligin basa aıtty. Ol sondaı-aq Qazaq­stan­nyń Reseıdegi elshisi I.Tas­ma­ǵam­betovtiń osy sharaǵa ar­naıy joldaǵan izgi tilek-sále­min kópshilikke oqyp berdi. Onda Nurlan Balǵymbaev­taı asyl uldaryn ulyqta­ǵan eldiń bul ardaqty isi bir­lik pen tirlikti, erge degen qurmetti bildiretini aıtylsa, Parlament Senatynyń Tóraǵasy Q.Toqaev óz jedelhatynda «Nurlan О́tepulyndaı qa­rym­dy qaı­ratkerdiń eline sińir­gen eń­begi ushan-teńiz, ol – táýel­siz­digimizdi baıandy etýge baryn salǵan, elimizdiń munaı salasynyń jedel jetilip damýyna ólsheýsiz úles qosqan naǵyz azamat», dep aıryqsha atap kórsetilgen. 

Qonaqtarǵa qosh keldi­ńiz aıt­qan Atyraý oblysy ákimi­niń birinshi orynbasa­ry S.Luq­panov óńir basshy­sy­nyń sálemin jet­kizip, Atyraý aımaǵy úshin Nurlan Balǵymbaev munaı­shylar áýletiniń beldi ókili, maıtalman munaıshy, memleket qaıratkeri, asyl azamat bolyp qala beretindigin atady. Áriptesteri U.Qarabalın men N.Shmanov Nurlan О́tepulynyń qaıratker retindegi san qyryn ashyp, Máskeýde, shetelderde alǵan tájirıbesin el munaı ónerkásibiniń damýyna sheber jumsaǵandyǵyn atap aıtty. Uzaqbaı Qarabalın: «Nurlan bizge ári basshy, ári aǵa, ári áriptes retinde ystyq. Ol únemi tek jumys babynda ǵana emes, salamatty ómir saltyn us­taný, qoǵamdyq máseleler bo­ıynsha da aqyl-keńesin aıtyp júretin», dep eske aldy. Onyń jarqyn isterin bú­gingi izbasarlary abyroımen jal­ǵastyryp kele jatqanyn aıtyp, «QazMunaıGaz» UK» AQ basqarma tóraǵasy S.Myń­baevtyń joldama-hatyn oqy­dy. Onda: «Qazaq mu­na­ıynyń bastaýynda Bal­ǵym­baevtar áýleti atalady. Sonyń ishin­de Nurlan О́tepuly sala­nyń táýelsizdik jyldaryn­da oń jolǵa qoıylýyna, qarysh­tap damýyna erekshe eńbek sińir­genin bilemiz. Onyń jarqyn júzi bárimizdiń jadymyzda saqtalady» degen joldar bar. 

Sonymen qatar Nurlan О́tepulymen qoıan-qoltyq aralasa qyzmet etken belgili munaıshylar Meńdesh Salıhov, Ǵalıaýsat Keshýbaev qaıratker azamattyń Qazaqstan munaı-gaz ónerkásibi mınıstri, Qazaq­stannyń Premer-Mı­nıstri bolyp turǵan kezindegi isker­lik qabiletterin, el yrysy­nyń dalaǵa shashylmaýyna jany kúıip eńbek etkenin úlken yn­tamen jetkizip, onyń qa­shanda tutas memleketke tıim­­­di utymdy pikirler aıtyp, sony buljytpaı oryndaı bilgenin basa atap ótti. «Nurlan О́tepulynyń esimi atalǵan jerde biz munaı ká­sipshiligin qosa aıtamyz. О́ıt­keni salanyń jańasha damýy, ınvestorlarmen tyǵyz baılanys, ónimdi tıimdi ón­dirý – onyń janyn salyp kiris­­ken isteri. Qazirgi munaı salasynyń damýy óz kásibi­niń maıtalmany N.Balǵym­baev salǵan izben kele jatyr. Osy sharany uıymdastyrý­da da munaıshylar zor úles qosty. Sonyń ishinde bizdiń usy­ny­symyzdy qoldaǵan «QazMunaıGaz» Barlaý О́n­dirý» AQ bas dırektory Qur­manǵazy Esqazıevke alǵy­sy­myzdy bildiremiz», dedi ol.

Naǵıma apa da sharany uıym­dastyrýshylarǵa rahme­tin aıtyp, munaıshylarǵa, barsha qatysýshylarǵa alǵy­syn bil­dirdi. Shara sońynda R.Otar­­baev­tyń halyqaralyq «Báı­­terek» qorynyń tóraǵa­sy N.Bal­­ǵymbaev bas keıip­ker­ler­diń biri bolyp tabylatyn «Bas» pesasynan úzindi qoıyl­dy. Sonan keıin aqyn, jýrnalıst B.Jetekbaıdyń re­dak­sııa­laýymen shyqqan «Nurlan Bal­ǵymbaev» atty kitap­tyń tu­saý­keseri ótti. Ki­tap úsh bó­limnen turady. Onda ómiri, qyz­met joldary, dos-ja­ran­dar­dyń estelikteri qamtyl­ǵan. Kesh sońynda Nurlan Bal­ǵym­­baev­tyń ómiri men qyzmet joldarynan derekti fılm kórsetildi.

Qosuıym MUQAShEV

ATYRAÝ