Elordada Eýropalyq odaq qarjylandyratyn Shekaralardy basqarýǵa qoldaý kórsetýge baǵyttalǵan baǵdarlamany úılestirý tobynyń úshinshi aımaqtyq otyrysy ótti. Jyl saıyn ótkiziletin otyrysqa Eýropalyq odaqtyń Qazaqstan men Qyrǵyzstandaǵy ókilderi, Syrtqy ister mınıstrlikteriniń jáne keden vedomstvolarynyń qyzmetkerleri qatysty.
Jıynda qatysýshylar atalǵan baǵdarlamanyń shekarany basqarýdaǵy jetistikteri men kezdesip qalatyn kedergilerge nazar aýdardy. Shekaralardy basqarýǵa qoldaý kórsetýge baǵyttalǵan baǵdarlama Eýropalyq odaqtyń Ortalyq Azııa elderimen shekaralardy basqarý salasyndaǵy áriptestiginiń mańyzdy bastamalarynyń biri bolyp sanalady.
Ol Ortalyq Azııada 2003 jyldan beri jumys istep keledi. Onyń búgingi toǵyzynshy kezeńi buǵan deıin atqarylǵan jumystardyń nátıjesine negizdelgen jáne ınstıtýttyq ózgeristerge, aralas mıgrasııalyq aǵymdardy basqarýǵa, sondaı-aq saýda-sattyqty qoldaýǵa baǵyttalǵan.
Otyrysta sóz alǵandardyń aıtýynsha, 2015 jyldan beri osy baǵdarlamanyń aıasynda Ortalyq Azııadaǵy memleketterden 1,9 myńǵa jýyq laýazym ıesi 200-deı is-sharaǵa qatysqan. Al 2003-2017 jyldary aralyǵynda Eýropalyq odaq atalǵan baǵdarlamany júzege asyrýǵa 40,8 mıllıon eýro bóldi.
Jıyn barysynda oǵan qatysýshylar Ortalyq Azııa memleketteri úshin 2018 jylǵa arnalǵan jumys josparynyń jobasyn da talqylady.
Álısultan QULANBAI,
«Egemen Qazaqstan»