Endi jurttyń barlyǵy da burynǵydaı jappaı bir sán úlgisine ilespeıdi. Árkim ózine úılesetinin kıedi. Zamanyna qaraı – adamy. Buryn «moda» qýǵan jurt endi jastardyń jańa termıni «trendke» baryp tireledi. Biraq qaı kezde de bul álemde bolyp jatqan úderisterden qalmaıtyn kerbezder men sylqymdar bar. Endeshe esikten enip kele jatqan jyldyń buıryǵy qandaı desek, álemdik dızaınerler onyń 13 belgisin atap otyr.
№1 trend: Sándi denım. Denım djıns tigetin matanyń «týysqany», aqshyl-kók tústeri bar maqtadan toqylǵan jumsaq mata. Bıyl da qarakók, kókshil, sur, qara denımnen tigilgen kombınezondar men jeıdeler sánnen qalmaıdy.
№2 trend: Jyly toqymalar. Denege yńǵaıly da jaıly kıimderdi unatatyndar toqymanyń ámbebaptyǵyn barlyq kezde baǵalaıdy. Kúndelikti jumysta trıkotajdan tigilgen kóılek, kostıým, beldemshe, keýdeshe, toptar men svıtshottardyń yńǵaıly ekenin umytpaıdy. Al dızaınerler onyń alpynshaq-salpynshaqtaryn barynsha azaıtyp, minsiz pishim arqyly sánqoılardyń kóńilin tabýǵa tyrysatyn bolady.
№3 trend: Vodolazka men kóılek vodolazkalar. Moıny qaıyrylatyn kóılek-koftalar barlyq kezde kerek. Ol qyz-kelinshekterdiń ǵana emes, erlerdiń de garderobynan tabylýy tıis yńǵaıly kıim sanalatyndyqtan sánnen qalmaıdy. Kún sýyqta pıdjaktyń da ishinen kıe salýǵa bolatyn, klassıkalyq kıimdermen de úılesetin vodolazka túrli-túrli dızaınmen aldaǵy jylda da dúken sórelerine shyǵady.
№4 trend: Woman in black. «Qara kóılekti áıel» stılin kim bilmeıdi?! Qulyn múshesi kelisken qyzdardy bylaı qoıǵanda, bádendi kelinshekterdi de tartymdy da aryq etip kórsetetin qara kóılekti myń qubyltyp kııýge bolady.
№5 trend: Qypsha bel. Myqynǵa beldik bolyp túsken ǵajaıyp aksent bıyl da, keler jyly da sándik minberlerdiń tórine talaı shyǵady. Bir qaraǵanda jalpıǵan dórekileý, metaldary bar beldikter báribir beldi názik etip kórsetedi.
№6 trend: Qaltalary qampıǵan paltolar. Qalyń tondarymyzdy tastap, juqalaý paltolar kıetin kezge jetkenimizde qaltalary syrtyna neshe túrli súlgimen, kózge túsetindeı etip tigilgen syrt kıimderdi kııýge bolady. Qys ótip, kóktem jetkende palto-manto, palto-kardıgan, kımono kıetin kúnder keledi.
№7 trend: Qampıǵan pýhovıkter. Qaqaǵan aıazdy kúnderde qus júni toltyrylǵan syrt kıimder netken jaıly, qandaı jyly?! Qampısa da jep-jeńil bul kıimdi keler jyly djınsmen de, kóılekpen de kıe berýge bolady. Ony iri toqylǵan bas kıim tolyqtyra alady.
№8 trend: Beldigi bar tondar. Neshe túrli bulǵyn tondardy qandaı beldikpen taqsańyz da qııalyńyzdyń shyrqaý shegi bilsin. Jińishke nemese jalpaq beldikti úılesimine qaraı tańdap taqsańyz, belińiz de jyly júredi.
№9 trend: Balaǵy qaıyrylǵan shalbarlar. Keń-mol, manjetpen tigilgen shalbarlar sporttyq aıaq kıimdermen ǵana emes, biz ókshe týflımen de jarasa ketedi. Tek bıylǵy sándi uzyndyq tobyqqa deıingi – 7/8 uzyndyq.
№10 trend: Ashyq tústi shulyqtar. Aldaǵy kúnderi neshe túrli ashyq tústi kolgotkalar men shulyqtardy kıimdermen kelistirip kıip júrýge bolady. Shulyqtardyń qalyń toqylǵandarynan bastap, eń juqasyna deıin sándi kórinedi. Al túrli-tústi, gúldi, órnekti kolgotkalar 70-80-jyldardy eske túsirip, jańa maýsymda qaıta oralady.
№11 trend: Jeıde-kóılek. Qyz-kelinshekterdiń jigitterden «tartyp alǵan» taǵy bir kıimi – jeıdeler. Biraq bul kıim qyzdarǵa jarasa ketkenin kim joqqa shyǵarsyn?! Sondyqtan jańa maýsymda dızaınerler názik te sándi kóılek-jeıdeler tigýdiń jarysyn bastap ta ketti.
№12 trend: Keń-mol pishilgen kıimder. Sán úlgisinde de erkindikke ıe bolý qashanda mańyzdy. Júz jerden moda qýamyn desek te ol yńǵaıly kıimge jetpeıdi. Nebir kerbezderdiń ózi «Oversaız» stılin unatady jáne klassıkalyq kıim úlgilerin ózi erkin júrip-turýǵa yńǵaılylyqty umytpaıdy.
№13 trend: Shilter. 2018 jyly sán áleminde dızaınerlerdiń basty qarýy jelbirshek bolady. Olar názik shilterlermen kóılek, sarafandardy ǵana emes, shalbar, short, kombınezon, tipti sýǵa shomylýǵa arnalǵan kıimderdi de sándeýge qoldanatyn bolady.
Aınash ESALI,
«Egemen Qazaqstan»