Qostanaı qalalyq ishki ister basqarmasynyń «Severnyı» bólimshesiniń keńsesi jóndelip, qaıta paıdalanýǵa berildi. Bul 1972 jyly salynǵan tıptik bala baqsha bolatyn. Biraq sodan beri , mine 45 jyl eshqandaı jóndeý kórmegen. 2006 jyly qalalyq ishki ister basqarmasynyń «Severnyı» bólimshesi ashyldy da, olar 90-shy jyldary bosap qalǵan bala baqsha ǵımaratyna ornalasqan bolatyn.
«Osydan bir jyl buryn oblys ákimi Arhımed Muhambetov ekeýimiz kelip, kórgende jaǵamyzdy ustaǵan edik. Qys aıynda bólimshe qyzmetkerleri qolǵap kıip otyr eken. Al tıptik keńse salý 1,5 mıllıard qarajatty qajet etedi. Biz tyǵyryqtan jol taptyq» deıdi oblystyq ishki ister departamentiniń bastyǵy, general-maıor Beket Aımaǵambetov.
General aıtsa aıtqandaı, apatty jaǵdaıdyń aldynda turǵan ǵımaratty qalpyna keltirýge barlyǵy 327 mıllıon teńge jumsaldy. Oǵan keńseniń tóbesi, esik-terezeleri, sanıtarlyq tehnıkasy, jylý, sý qubyrlary túgeldeı jańartyldy.
«Buryn ǵımaratta ótkizý beketi bolmaıtyn. Qazir oǵan rentgen ótkizgish qoıyldy, kabınetter kóbeıtildi, olardyń barlyǵy vıdeokameralarmen jabdyqtaldy. Kameralar tergeýshiler jumysyndaǵy keleńsiz jaǵdaılardyń aldyn alatyn bolady» dedi «Severnyı» bólimshesiniń bastyǵy, podpolkovnık Janserik Hasanov.
Endi bir-eki kúnde keńse jıhazben jabdyqtalyp, alty aı boıy basqa orynda ýaqytsha otyrǵan qyzmetkerler keńsege jaıǵasatyn bolady.
Názıra Járimbet
«Egemen Qazaqstan»
Qostanaı