Ońtústik Qazaqstan oblysynda bıylǵy jyly 67 medısınalyq tirektiń qurylysy júrgiziletin bolady. Bul týraly oblys ákimdiginiń keńeıtilgen májilisinde oblystyq densaýlyq saqtaý basqarmasynyń basshysy Muqan Egizbaev málim etti.
Eger atalǵan joba iske assa, oblystaǵy medısınalyq tirekterdiń qajettiligi tolyq qamtamasyz etilmek.
Basqarma basshysynyń aıtýynsha, byltyrǵy jyly óńirde 33 densaýlyq saqtaý nysanynyń qurylysy júrgizilgen. 2018 jyly taǵy da 9 medısınalyq, onyń ishinde 6 emhana men 1 aýyldyq emhana jáne 2 dárigerlik ambýlatorııanyń qurylysy josparlanǵan. Budan bólek, bıyl memlekettik – jekeshelik áriptestik aıasynda Shymkent qalasynda 3 emhana qurylysy bastaý almaq.
Májilis barasynda oblystyq qarjy basqarmasynyń basshysy Abdrahman Tasybaev 2017 jylǵy bıýdjettiń atqarylýyn baıandady. Oblys boıynsha 2017 jyldyń qorytyndysymen memlekettik bıýdjettiń kirister jospary 102,1 paıyzǵa oryndalǵan. Jospardan tys 6,5 mlrd.teńge qosymsha kiris túsken. Onyń ishinde respýblıkalyq bıýdjet 101,3 paıyzǵa oryndalyp, 2,5 mlrd.teńge artyq túsim baıqalǵan. Al jergilikti bıýdjettiń kirister jospary 103,4 paıyzǵa oryndalyp, túsim 4 mlrd.teńgege kóbeıgen.
«2016 jyldyń qorytyndysymen salystyrǵanda túsimder 18,4 mlrd.teńgege ósip otyr» , - dedi oblystyq qarjy basqarmasynyń basshysy Abdrahman Tasybaev.
Májiliste jekeshelendirýdi júrgizý barysy týraly baıandaǵan Abdrahman Batyrbekuly 2017 jyly jekeshelendirýge jatatyn 21 nysannyń 10-y jalpy 557,63 mln.teńgege satylǵanyn jetkizdi. Jalpy byltyr oblystyq kommýnaldyq menshiktegi múlikti satýdan oblystyq bıýdjetke 129,9 mln.teńge túsken.
О́z baıandamasynda oblystyq ekonomıka jáne bıýdjettik josparlaý basqarmasy basshysy Arman Sábıtov josparly kezeńge arnalǵan bıýdjetti qalyptastyrý nemese naqtylaý barysynda qoldanystaǵy bıýdjettik zańnama talaptaryn qatań saqtaýdy usyndy.
Jıyndy qorytqan óńir basshysy bıýdjettiń atqarylýyna basa nazar aýdaryp, jekeshelendirýdiń keshendi josparyn belgilengen merzimde ótkizýdi, respýblıkalyq qarjylardyń qysqarýyna jol bermeýdi jáne densaýlyq saqtaý jónindegi perspektıvalyq jospardy «Densaýlyq» memlekettik baǵdarlamasymen úılestire otyryp iske asyrýdy tapsyrdy.
«Densaýlyq saqtaý júıesiniń ınfraqurylymyn damytýda memlekettik jekemenshik áriptestik tetikterin barynsha qoldaný qajet. Osy rette bıyl atqarylatyn jumystardy júıelep, naqty is-áreket josparyn bekitýdi tapsyramyn»,- dedi Janseıit Qanseıituly.