Kásipqoı bokstan WBA, IBF, WBC jáne IBO tujyrymdary boıynsha álem chempıony Gennadıı Golovkın (37-0-1, 33 KO) «Qaraǵandy oblysynyń qurmetti azamaty» ataǵyna ıe boldy.
Tıisti tósbelgi men kýálikti boksshyǵa tapsyryp turyp óńir basshysy Erlan Qoshanov: «Gennadıı Qaraǵandy oblysynyń ǵana emes, búkil Qazaqstannyń maqtanyshy. Qazaqtyń naǵyz batyry!», dedi.
Bylǵary qolǵap sheberine bul ataq ótken jyldyń jeltoqsan aıynda ótken oblystyq máslıhattyń XIII sessııasynda berilgen bolatyn.
Alystaǵy Amerıkadan týǵan jerine arnaıy at basyn tiregen Gennadıı Golovkın ózine kórsetilgen qurmetke shyn tebirendi. Saltanatty sharada boksshy jerlesterine rızashylyq sezimin bildirip, olardy aldaǵy ýaqytta da jeńisterimen qýanta beretinine sendirdi.
– Qazaqstan Respýblıkasynyń azamaty retinde bul maǵan kórsetilgen zor qurmet. Eń aldymen memleketimizdiń basshysy Nursultan Ábishuly Nazarbaevqa sportqa qamqorlyq tanytyp, ony damytyp júrgeni úshin alǵys aıtqym keledi. Meni Qaraǵandy oblysynyń qurmetti azamaty retinde tanyǵan depýtattarǵa da alǵys sezimin jetkizemin, – dedi Gennadıı Golovkın.
Qaraǵandynyń mańyndaǵy eldi meken Maıqudyqta týǵan Gennadıı Golovkın kásipqoı rıngte ǵana emes, áýesqoı boksta da talaı bıikti baǵyndyrǵan sańlaq sportshy. Ol Azııa oıyndary (2002) men Azııa birinshiliginiń (2004) chempıony, álem chempıonatynyń (2003) jeńimpazy, Afıny-2004 Olımpıadasynyń kúmis júldegeri.
Qaırat ÁBILDA,
«Egemen Qazaqstan»
Qaraǵandy oblysy