Búgingi tańda jańǵyrý memlekettik saıasattyń mańyzdy bóligine aınalyp otyr. Osy oraıda «Jas Otan» jańǵyrýdy ózinen, Sezi aldynda Ortalyq keńes múshelerin saılaýdan bastamaq.
Janama saılaýdan ashyq tikeleı saılaý júıesine ótý arqyly «Jas Otan» kóshbasshylardyń saıası arenada saılaý prınsipterimen tanysyp, ary qaraı ashyq saılaýǵa túsý joldaryn jetik meńgerýin kózdeıdi. Tikeleı saılaý júıesi daýys berýshilerge úmitkerler arasynan úzdigin anyqtap, eń laıyqtysyn tańdaýda erkindik beredi.
Saılaýdy ótkizýdegi basty maqsat – «Jas Otannyń» ashyqtyǵy men saılanǵan Keńes músheleri arqyly qoǵammen baılanysta bolýǵa daıyn ekendigin kórsetý.
Saılaý 2 kezeńnen turady. 1-kezeńde 18-25 qańtar aralyǵynda «Jas Otan»-nyń áleýmettik jeli paraqshalarynda kórsetilgen silteme arqyly tirkelýden ótý kerek. 25 qańtar - 8 aqpan aralyǵynda úmitkerler #JasOtanSailau heshtegimen Instagram paraqshalarynda jarııalaǵan vıdeo joldaýyna 5000 laık jınaýlary qajet. Al áleýmettik jeli qoldanbaıtyn úmitkerler qol jınaý arqyly 500 adamnyń qoldaýyna ıe bolýlary mindetti. 2-kezeń 10-24 aqpan aralyǵynda jetkilikti qoldaý jınaǵan úmitkerlerge onlaın daýys berý ótedi.
Daýys berýge «Jas Otan» músheleri qatysa alady. 26 aqpan saılaý nátıjeleri baspasóz betteri men uıymnyń áleýmettik jelidegi paraqshalarynda jarııa bolady. 18-29 jas arasyndaǵy saılaýaldy naqty jospary bar kez kelgen kóshbasshynyń qatysýǵa múmkindigi bar.