Aqtóbe aımaǵynda aýyl sharýashylyǵy óndiristik kooperatıvteriniń qyzmeti jańa sapalyq kezeńge aıaq basty. Onyń basty kórinisi munda aýyl sharýashylyǵy ónimderin óńdeıtin shaǵyn óndiris oryndarynyń ashyla bastaýy.
Osyndaı sút óńdeıtin shaǵyn sehtyń biri Qosestek aýylynda iske qosyldy. Ony Erkin О́tegenov jetekshilik jasaıtyn «Qosestek» aýyl sharýashylyǵy óndiristik kooperatıvi júzege asyrdy.
Bul úshin kooperatıv músheleri ózara keńese kelip, eń aldymen tıisti ınfraqurylymdyq júıe jasaqtaý qajet degen ortaq uıǵarymǵa keledi. Atap aıtqanda aldaǵy ýaqytta salynatyn shaǵyn óńdeý nysany úshin elektr jelisi tartylady. Budan soń gaz, sý jáne káriz júıeleri iske qosylady. Kelesi kezekte aýyzbirshiligi men yntymaǵy jarasqan aýyl azamattary qýattylyǵy aýysymyna bir tonna shıkizatty óńdep, budan ázir ónim shyǵara alatyn qural-jabdyqtar satyp alýǵa qol jetkizedi.
Sóıtip, «Qoseskek» aýylsharýashylyǵy óndiristik kooperatıvi búgingi kúni sútten qaımaq, súzbe, maı óndirýge múmkindik aldy.
– Qazirgi kúni biz úshin eń bastysy shıkizat óndirý kólemin kemitip almaý. Máselen ótken jyly biz turǵyndardan 300 tonna sút qabyldap alǵan edik. Búgingi meje osy mólsherden tómendemeı, ony sút óńdeý sehyna tapsyrý, - deıdi egemen.kz tilshisine kooperatıv tóraǵasy Erkin О́tegenov.
Olardyń búgingi alǵa qoıǵan maqsattary men is-josparlary da ómirsheń. Sonyń ishinde qosestektikter burynǵy jyldary jergilikti maı zaýytyna shyǵarylǵan irimshiktiń erekshe túrin búgingi zamandaǵy tehnologııanyń kómegimen qaıta jańǵyrtýdy kózdep otyr.
«Bárin aıt ta, birin aıt, Kollektıvtiń jyryn aıt» dep tókpektetken eken baıaǵyda jaryqtyq Bı-aǵań, Beıimbet Maılın. Osy ólshemge «Qosestek» aýylsharýashylyǵy óndiristik kooperatıvi músheleriniń ilkimdi is-qımyldary da dóp kelip turǵandaı.
Temir Qusaıyn
Aqtóbe oblysy
Qarǵaly aýdany
Qosestek aýyly