Bıyl Ońtústikte 7 myń adamdy qysqa merzimdi kásiptik oqýǵa joldaý josparlanyp otyr. Sonyń ishindegi mańyzdysy - «Ońtústiktiń qolónershisi» kýrsy bolmaq.
Atalǵan kýrsqa qatysýshylarǵa aı saıyn 16 759 teńge kóleminde stıpendııa tólenedi. Sondaı-aq, basqa eldi mekennen kelýshilerge jol júrý aqysy retinde 9 620 teńge, turǵyn úıdi jaldaýǵa 12 025 teńge tólenetin bolady. Kýrsty úzdik bitirgen 20 túlekke oblys ákiminiń arnaıy granty retinde 240 myń teńge taǵaıyndalyp otyr. Jalpy Ońtústik Qazaqstan oblysynda Elbasynyń «Bolashaqqa baǵdar: rýhanı jańǵyrý» baǵdarlamasy aıasynda «Ońtústik qolónershisi» pılottyq jobasy boıynsha 300 qolónershi 3 aılyq merzimdi oqýmen qamtylatyn bolady. Ustazdarǵa da jalaqy tólenedi. Mysaly, mamandardy oqytýmen aınalysatyn qolóner sheberlerine ár oqýshyny oqytqany úshin aı saıyn 30 myń teńgeden tólenbek. Dıplomy bar qolóner sheberleri sabaq berýge nemese tájirıbelik tálimger sheberi retinde jumysqa tartylatyn bolady.
Shymkent qalasyndaǵy Beısbekovter otbasylyq jeke «Altyn Orda» galereıasynyń jumysymen tanysý barysynda oblys joba boıynsha qolónerge barynsha qoldaý kórsetiletinin atap ótti. «Altyn Orda» galereıasynyń sheberhanalarynda alasha, kilem, teri, zerger, keramıka, toqyma buıymdary qoıylǵan qolóner sheberleriniń kórmesi uıymdastyryldy.
– Ulttyq ónerimizdi ulyqtaıtyn mundaı erekshe joba Ońtústik óńirinde oblys ákimi J.Túımebaevtyń bastamasymen alǵash ret qolǵa alynyp otyr. Rýhanı jańǵyrý aıasynda júzege asatyn bul joba qazaqtyń ata kásibin, salt-dástúrin nasıhattaýǵa keremet múmkindik týǵyzady. Týrızmdi damytýǵa da tikeleı yqpaly tıedi. Bastamanyń nátıjesinde nebir talantty sheber jastardyń ósip shyǵatynyna senimim kámil, - deıdi Qazaqstan Qolóner sheberleri odaǵynyń oblystyq fılıalynyń tóraǵasy Bolatbek Beısbekov.
Ǵalymjan Elshibaı,
«Egemen Qazaqstan»