Elbasynyń AQSh-qa sapary álemdik BAQ nazarynda

Qazaqstan Boeing ushaǵyn satyp alyp, GE lokomotıvterin qurastyrmaq - The New York Times

Qazaqstan Prezıdenti Nursultan Nazarbaev AQSh-tyń birneshe kompanııa­sy­men 7,5 mln dollar turatyn kelisim­shart­tarǵa qol qoıdy. Onyń ishinde Orta­lyq Azııaǵa jolaýshylar ushaǵyn tasymaldaý men Qazaqstanda lokomotıv qurastyrý tý­raly kelisim de bar. 

«Kelisimshart boıynsha biz Boeing-ten ushaqtar alyp, General Electric kom­pa­nııasynyń lokomotıvterin Qazaq­stan­da qu­ras­tyratyn boldyq», dedi Nur­sultan Nazarbaev Aq úıde Donald Tramp­pen kezdesý kezinde. 

Qazaqstan Prezıdentiniń aıtýynsha, aýyl sharýashylyǵy sektoryna ınvestı­sııa tartý boıynsha da birneshe joba qaras­ty­rylǵan. 

Tramptyń Qazaqstan Prezıdentimen kezdesýi ne úshin mańyzdy? - The Heritage Foundation

Aq úıde Donald Tramp Qazaqstan Prezıdenti Nursultan Nazarbaevpen kez­des­ti. Bul – olardyń ekinshi ret kezdesýi. 

AQSh 1990 jyldan bastap Qazaq­stan­men jaqsy qarym-qatynas ornat­qan. Nursultan Nazarbaevtyń resmı sapary ba­rysynda AQSh-tyń Ortalyq Azııanyń geosaıasaty men ekonomıkasyn nazarda ustaıtyny baıqaldy. 

AQSh-tyń Aýǵanstandaǵy terrorız­mge qarsy kúresinde Ortalyq Azııa ma­ńyzdy ról atqarady. Biraq Barak Obama ke­zinde Amerıkanyń Ortalyq Azııa­men baılanysy álsiredi. Endi AQSh aı­maqpen strategııalyq qarym-qatynasty ny­­ǵaıtqysy keledi. Al Nursultan Nazar­b­aevtyń Aq úıge kelýi – bul maq­sat­­ty júz­ege asyrý úshin taptyrmaıtyn múm­kindik. 

Qazaqstan – Eýrazııa júreginde orna­lasqan, ekonomıka, qaýipsizdik, terrorızm­men kúres, energetıkalyq máseleler boıy­nsha Ortalyq Azııadaǵy kóshbasshy mem­leket. Al Amerıka Ortalyq Azııamen, onyń ishinde Qazaqstanmen áriptestiktiń ma­ńyzdy ekenin biledi. 

Qazaqstan Sırııa boıynsha Astana prosesi kelissózderin ótkizip, qantógisti toqtatýǵa tyrysty. Bul – óte úlken eńbek jáne basqa memleketterge jaqsy úlgi bo­lar­lyq áreket. 

AQSh Qazaqstanmen áriptestikti da­my­týǵa múddeli. Sondyqtan Nursultan Nazarbaevtyń AQSh-qa saparynyń mańy­zy zor. 

Nursultan Nazarbaev Trampty Qazaqstanǵa shaqyrdy - XinhuaNet

Qazaqstan Prezıdenti Nursultan Nazarbaev Aq úı basshysy Donald Tramp­pen kezdesip, ekijaqty áriptestikti ny­ǵaıtý týraly sóılesti. Kezdesý bary­synda Aýǵanstan máselesi týraly aıty­lyp, Soltústik Koreıanyń ıadrolyq qaýpi sóz boldy. Kezdesýde Nursultan Nazarbaev Donald Trampty Qazaqstanǵa shaqyrdy. 

Donald Tramp Qazaqstannyń BUU Qaýipsizdik Keńesine tóraǵalyq etetinin atap ótip, Nursultan Nazarbaevpen ha­lyq­aralyq problemalardy talqy­la­ǵa­nyn aıtty. Sonymen qatar eki memleket HHI ǵasyrdaǵy keńeıtilgen strategııalyq árip­testik týraly birlesken málimdeme ja­sady. 

Aıta ketý kerek, AQSh pen Qazaqstan ara­syndaǵy saýda aınalymy 2016 jyly 1,9 mlrd dollarǵa jetti. Sondaı-aq kez­de­sý barysynda Donald Tramp pen Nursultan Nazarbaev ekonomıkalyq baı­l­a­nystardy nyǵaıta túsý kerektigine to­q­taldy. 

7,5 mln dollarǵa jasalǵan kelisimshart negizinde endi Qazaqstan Ortalyq Azııada alǵash ret Boeing 737 MAX 8 ushaǵyn alady. Sonymen qatar Air Astana ulttyq áýe kompanııasynyń 2021 jyly Boeing 787 Dreamliners ushaǵyn alýdy josparlap otyrǵany aıtyldy. QTJ men General Electric 900 mln dollar turatyn eki kelisimshartqa otyrdy. AQSh pen Qazaqstan sıfrly ınfraqurylym, aýyl sharýashylyǵy, farmasevtıka, qarjy, kosmosty ıgerý men densaýlyq saq­taý salalary boıynsha da áriptestikti nyǵaıtýǵa kelisti. Sondaı-aq AQSh – Qazaqstan tikeleı áýe reısin ashý da jo­s­par­lanǵany aıtyldy. 

Daıyndaǵan Gúlnur QÝANYShBEKQYZY, «Egemen Qazaqstan»