Memlekettik mekemeler men memlekettik qyzmette júrgen laýazym ıelerine qyzmettik kólikter ne úshin beriledi? Álbette, ózderine júktelgen tikeleı fýnksııalyq mindetterdi oıdaǵydaı atqarý, sondaı-aq ýaqyt jaǵynan utý jáne kidiriske jol bermeý úshin emes pe?! Osy oraıda Memlekettik qyzmet isteri jáne sybaılas jemqorlyqqa qarsy is-qımyl agenttigi «Qyzmettik kólik – qyzmettik maqsatta» degen aksııaǵa bastamashy bolǵany qoldaýǵa ábden turarlyq. Bul is-shara óz ataýynan kórinip turǵanyndaı qyzmettik kólikterdi qyzmetten tys maqsattarǵa paıdalaný derekteri men kórinisterin tómendetýge baǵyttalǵan.
Agenttiktiń Aqtóbe oblysy boıynsha departamenti ótken jyly 23 ret arnaıy reıd ótkizip, memlekettik avtokólikterdi jeke sharýalarǵa paıdalanýdyń 33 deregin anyqtady. Onyń syrtqy sıpatyna kóz júgirtsek, birinshi kezekte munyń ózi júrgizýshilerdiń kinási bolyp shyǵady. О́ıtkeni departamentten alynǵan derekter kóp jaǵdaılarda qyzmettik kólikterdi júrgizýshiler óz menshigindeı kórip kelgenin kórsetedi. Sóıtip olar qyzmettik kólikterdi taksı retinde paıdalanyp, turǵyndardy tasyǵan.
Árıne, mundaı jaǵdaıda janarmaı shyǵynyn rýlde otyrǵandar qaltasynan shyǵarmaıtyny belgili. Bul memlekettik avtokólikterge beriletin tólemaqylar men talondar esebinen jabylady. Ekinshiden, kezdeısoq júrister memlekettik avtokóliktiń merziminen buryn tozýy men eskirýine de áser etedi. Sodan keıin memlekettik mekemeler tarapynan taǵy da jyljymaly quraldar satyp alýǵa tapsyrystar berilip jatady. Eki arada bıýdjet qarjysy shyǵyn bolady.
Bir qyzyǵy, tipti qyzyǵy emes-aý, túsiniksizdigi, mundaı teris kórinister oryn alǵan kezde tártiptik sharalar osy ýaqytqa deıin tek memlekettik mekemelerdiń júrgizýshilerine qatysty ǵana qoldanylyp kelipti. Sonda ózderine bekitilip berilgen memlekettik avtokólikterdiń júris-turysyna baqylaý jasamaıtyn, bul jóninde ózderine júktelgen jaýapkershilikti sezinbeıtin mekeme basshylary sútten aq, sýdan taza bolyp qala bere me?
Aldaǵy ýaqytta mundaı jaǵdaı bolmaıdy. Kelesi kezekte biz osyndaı kórinisterge jol bergen, baqylaýdy óz betimen jibergen mekeme basshylaryn da jaýapkershilikke tartý máselesin oılastyryp otyrmyz, – deıdi Memlekettik qyzmet isteri jáne sybaılas jemqorlyqqa qarsy is-qımyl agenttiginiń Aqtóbe oblysy boıynsha departamentiniń basshysy Qaıyrjan Tokýshev.
Árıne, bul aıtylǵandar kásiporyn basshylarynyń tikeleı ózderi qyzmettik kólikterdi jeke bastyń múddelerine paıdalanbady nemese paıdalanbaıdy degen uǵymdardy bildirmeıdi. Mundaı derekter de bar. Olardyń qatarynda Aqtóbe qalasy ákimi apparatynyń burynǵy basshysy Juman Zeıneniń, №10 Aqtóbe qalalyq balalar men jasóspirimderge arnalǵan sport mektebiniń dırektory Baqtııar Tóleýovtiń, Temir aýdandyq aýrýhanasynyń basshysy Esentemir Demegenovtiń jáne Qobda aýdandyq veterınarııa stansasynyń basshysy Tımýr Qulmetenovtiń aty-jónderin ataı alamyz. Qyzmettik kólikterdi qyzmetten tys maqsattarǵa paıdalaný kórinisteri departament mamandary men sarapshylary júrgizgen reıdter kezinde oblystyq mádenıet, qujattama jáne arhıvter, kásipkerlik, qarjy, din isteri, jerdiń paıdalanylýy men qorǵalýyn baqylaý, jer qatynastary, dene shynyqtyrý jáne sport basqarmasynda oryn alǵany qynjyltpaı qoımaıdy. Mundaı jaǵymsyz jaıttardyń Aqtóbe qalasyna jáne Yrǵyz ben Hromtaý aýdandaryna da qatysy bar.
Endeshe atalǵan basqarmalardyń basshylary Marjan Qorǵanbaeva, Anar Darjanova, Gúlqasıma Súıintaeva, Joldas Qalmaǵambetov, Ábdýhat Myrzalın, Qabaı Sársenǵalıev, Nurlybek Júsipov pen Aqtóbe qalasy jáne Yrǵyz ben Hromtaý aýdandarynyń ákimderi Ilııas Ospanov, Mádı Eleýsizov pen Amanǵalı Berdalın bul jaıtqa tıisti baqylaý qoıady degen senimdemiz. Aıtalyq, joǵaryda atalǵan keıbir basqarmalar men Aqtóbe qalasy ákimdigine qarasty memlekettik mekemelerdiń qyzmet kólikteri júrgizilgen reıdter barysynda birneshe ret ustalypty. Bul derektiń ózi basqarma basshylary men qala ákimi tarapynan tıisti baqylaýdyń joqtyǵyn kórsetedi.
Sóz sońynda aıtarymyz, búgingi kezde tildik qorymyzda «stıker» degen sóz paıda bola bastady. Bul tolyq aqparat beretin arnaıy belgini memlekettik avtokólikke ornatý nemese japsyrý degen uǵymdy bildiredi. Munda onyń qandaı basqarma men departamentke nemese qandaı bıýdjettik mekemege qarasty ekeni kórsetilip, bul máselege tolyq ashyqtyq pen jarııalylyq beriledi. Bul ıgi iske qozǵaý salǵan da agenttik bolyp shyqty. Soǵan sáıkes Aqtóbe oblysyndaǵy aýmaqtyq departamentterge qarasty qyzmettik avtokólikterge arnaıy stıkerler tolyqtaı ornatylǵan. Al osy baǵytta oblystyq basqarma basshylarynyń qımyly áli de bolsa baıaý, selsoq, enjar bolyp otyr. Munyń ózi olardyń qyzmettik kólikterdi jeke basynyń múddelerine paıdalanýdan bas tartqysy kelmeıtin is-áreketti tanytpasyna kim kepil?
Qyzmettik avtokólikterge stıkerler ornatý belgili bir normatıvtik-quqyqtyq aktilermen jáne zańdyq kúshi bar tártiptermen bekitilgen is emes. Bul azamattyq qoǵam men ózara is-qımyldy damytýdy kózdeıtin ári ortaq maqsatqa jetýdi basty ustanym sanaıtyn agenttiktiń bastamasy. Al tutastaı alǵanda «Qyzmettik kólik – qyzmettik maqsatta» aksııasynyń basty maqsaty da osy arnadan tamyr tartady. Bir sózben aıtqanda, qyzmettik kólikterge stıkerler ornatý – ardyń isi bolmaq.
Temir QUSAIYN, «Egemen Qazaqstan»
AQTО́BE
Sýrette: stıkerler osylaı ornatylady