«Halyqaralyq baǵdarlamalar ortalyǵy» AQ-nyń prezıdenti Janbolat Meldeshovtiń málimdeýinshe, búginde shetelge baryp bilim alýǵa nıetti azamattardyń sany óte az.
Onyń bir sebebi retinde halyqtyń «Bolashaq» baǵdarlamasy týraly aqparatpen qanyqpaǵany aıtylýda. «Halyqaralyq baǵdarlamalar ortalyǵy» AQ-y osy máseleni sheshý, ózge elge baryp bilim alatyndardyń qataryn kóbeıtý maqsatynda álemniń damyǵan elderiniń jáne otandyq joǵary oqý oryndarynyń ókilderin shaqyryp, Shymkenttegi «Rixos Khadisha Shymkent» qonaqúıinde bilim kórmesin uıymdastyrdy. «Qazirgi tańda ózge elderde oqıtyn jastardyń 85 paıyzy Astana, Almaty qalalaryna tıesili. Endi ońtústikqazaqstandyq jastardyń sanyn arttyrsaq degen jospar bar», - deıdi J.Meldeshov.
Bilim jáne ǵylym mınstrliginiń qoldaýymen ótken «Halyqaralyq bilim berý – 2018» kórmesine oblys ákimi Janseıit Túımebav qatysyp, qonaqtarǵa óńirdiń bilim salasyndaǵy múmkindikteri men áleýetin tanystyrdy.
«Elbasy árdaıym óziniń halyqqa arnaǵan Joldaýlarynda jastardyń bilimdi de, básekege qabiletti bolý kerektigin aıtyp keledi. Mine, osy maqsatta «Bolashaq» halyqaralyq stıpendııasy quryldy. Atalǵan baǵdarlama aıasynda álemniń 35-ten astam elinde 12 myńnan astam qazaqstandyq azamat bilim aldy. Búginde baǵdarlama boıynsha bilim alǵan 300-den astam ońtústikqazaqstandyq jas elimizdiń ekonomıkalyq damýyna óz úlesterin qosýda. Halyq sany jaǵynan kósh basynda turǵan óńirimiz «Bolashaq» baǵdarlamasyna qatysý boıynsha da birinshi orynda bolý kerek dep oılaımyn», - dedi Janseıit Qanseıituly.
Kórmege AQSh, Ulybrıtanııa, Eýropa men Azııa jáne TMD elderiniń 83 joǵary oqý oryndary, til úıretý mektepteri men bilim agenttikteri qatysty. Olar shara barysynda shet tilderinde erkin sóıleıtin, qabiletti jastardy oqýǵa shaqyrdy. Kórmege birinshi kúnniń ózinde shetelde oqýdy armandaıtyn 4 myńnan astam jas keldi.
Sondaı-aq, kórme aıasynda qazaqstandyq jáne sheteldik joǵary oqý oryndarynyń bilim agenttikteri arasynda kezdesý uıymdastyrylyp, «Bolashaq» baǵdarlamasyn paıdalaný aýqymyn keńeıtý jaıy talqylandy.
Ǵalymjan ELShIBAI, «Egemen Qazaqstan»