Elimizdiń stýdentteri halyqaralyq ekologııa baıqaýynda joǵary nátıje kórsetip, júldeli II oryndy ıelendi. Jarys 6–9 maýsym aralyǵynda О́zbekstannyń Samarqand qalasynda ótken «Eko-zakovat» halyqaralyq ekologııalyq saıys aıasynda uıymdastyryldy.
Akademık E.A.Bóketov atyndaǵy Qaraǵandy ulttyq zertteý ýnıversıtetiniń komandasy ekologııa, qorshaǵan ortany qorǵaý, turaqty damý, tabıǵı resýrstardy tıimdi paıdalaný, klımattyń ózgerýi taqyryptary boıynsha bilimi men kásibı daıarlyǵyn kórsete bildi. Baıqaýǵa Qazaqstan, Qyrǵyzstan, Tájikstan, Túrikmenstan, Ázerbaıjan memleketterinen, О́zbekstannyń barlyq óńirinen kelgen stýdentter qatysty. Qatysýshylar ekologııalyq qaýipsizdik pen turaqty damýdy qamtamasyz etýge baǵyttalǵan ózekti máselelerdi talqylady.
Qaraǵandy ulttyq zertteý ýnıversıteti komandasyna botanıka kafedrasynyń aǵa oqytýshysy, ekologııa magıstri Roza Mýsına jetekshilik etti. Komanda quramynda Gıýnaıa Allahverdıeva, Madına Ásetqyzy, Álısher Jeksembaev, Aıjan Sarsenova, Malıka Tashkenbaeva, Birjan Ospan boldy.
Aıta keteıik, «Eko-zakovat» halyqaralyq baıqaýy jastardyń ekologııalyq mádenıetin arttyrýǵa, halyqaralyq yntymaqtastyqty damytýǵa, tájirıbe almasýǵa, qorshaǵan ortany qorǵaý salasyndaǵy bastamalardy qoldaýǵa baǵyttalǵan. Stýdentterdiń jetistigin Qazaqstannyń Samarqand qalasyndaǵy konsýly Abzal Nurashov quttyqtap, jastarymyzdyń halyqaralyq ekologııalyq jobalar men bastamalarǵa belsendi qatysýynyń mańyzyn atap ótti.
Arýjan DOSYMHAN,
QarUZÝ stýdenti