Túrkııa astanasy Ankarada Olımpıada chempıony Bekzat Sattarhanovqa arnalǵan kitap jaryq kórdi. «Aqyndardyń kózinde hám sózinde Bekzat Sattarhanov» atty eńbek túrik tilinde basylyp shyqty.
Kitapta boksshynyń ómir joly qysqasha baıandalyp, oǵan arnalǵan 35 avtordyń 45 óleńi túrik tiline aýdarylyp berilgen. Sonymen qatar eńbekte Bekzat Sattarhanov týraly jarııalanǵan kitaptardyń tizimi engizilgen. Oqyrmandar chempıon týraly elimizdiń belgili tulǵalarynyń, sportshylardyń, Sıdneı Olımpıadasyndaǵy qarsylastarynyń pikirlerimen de tanysa alady.
Jınaqty qurastyrýshy – Erjan Arǵynbaev. Avtor ár jyldary gazet-jýrnaldarda jarııalanǵan óleńderdi jınaqtap, aldymen qazaq tilinde kitap etip shyǵarǵan. Keıin eńbekti ózi túrik tiline aýdaryp, Túrkııada jarııalaýǵa usynǵan.
Jınaq Eýrazııa Jazýshylar odaǵyna qarasty «Bengü» baspasynan jaryq kórdi. Ankarada ornalasqan bul uıym túrki halyqtarynyń ádebıeti, mádenıeti men tarıhyna qatysty eńbekterdi túrik tilinde shyǵaryp keledi. Osy ýaqytqa deıin baspadan túrki dúnıesine arnalǵan myńǵa jýyq kitap jaryq kórse, olardyń seksenge jýyǵy Qazaqstan taqyrybyna arnalǵan.
Kitaptyń túrik tilinde shyǵýyna Eýrazııa Jazýshylar odaǵynyń tóraǵasy, ǵalym-aýdarmashy Ýfýk Týzman qoldaý kórsetken.
Avtordyń aıtýynsha, kitaptyń basty maqsaty – chempıonnyń ónegeli ómirin keıingi býynǵa tanytyp, úlgi etý. Túrki halyqtaryna ortaq qundylyqtardy nasıhattaýǵa baǵyttalǵan bul joba eki el arasyndaǵy mádenı-gýmanıtarlyq baılanysty nyǵaıtýǵa da úles qospaq.