Senatta jergilikti ókildi organdarmen (máslıhattarmen) ózara is-qımyl jónindegi keńestiń alǵashqy otyrysy ótti, dep habarlady Senattyń baspasóz qyzmeti.
Keńes Tóraǵasy, Parlament Senaty Tóraǵasynyń orynbasary Sergeı Gromov Keńestiń negizgi mindeti jergilikti memlekettik jáne ózin ózi basqarý men aımaqtardy damytý salasyndaǵy zańnamany jetildirý jónindegi usynystar ázirleý ekenin eske saldy. S.Gromov atap ótkendeı, Memleket basshysynyń konstıtýsııalyq reformalaryn iske asyrý aıasynda Parlament pen barlyq deńgeıdegi máslıhattar aldyna bıliktiń ár tarmaǵyna jaýapkershilik pen ókilettikti tolyq kólemde iske asyrý týraly mańyzdy mindet qoıylyp otyr.
Otyrys barysynda Keńestiń 2018 jylǵy jumys jospary bekitildi. Prezıdent N.Nazarbaevtyń Qazaqstan halqyna arnaǵan Joldaýyn iske asyrýǵa arnalǵan Keńes músheleriniń otyrysy, sondaı-aq Qaraǵandy oblysynda ótetin kóshpeli otyrysy jospardaǵy negizgi sharalar qatarynda kórsetilgen. Kóshpeli otyrysta aımaqtaǵy jergilikti memlekettik basqarý júıesin jetildirý máseleleri talqylanbaq.
Otyrysta uıymdyq máseleler de qaraldy. Senator Asqar Beısenbaev Keńes tóraǵasynyń orynbasary, al senator Tóleýbek Muqashev hatshysy bolyp saılandy.