Memleket basshysy óziniń Qazaqstan halqyna arnalǵan Joldaýynda elimizdiń ustazdar qaýymyna asa mańyzdy mindetterdi júktep, qandaı baǵytta jumys júrgizilýi qajettigin naqty atap ótti. Elbasy jańa talapqa sáıkes «Bilim berý baǵdarlamalarynyń negizgi basymdyǵy únemi ózgeristerge jáne jańa bilimdi meńgerý qabiletin damytýǵa beıim bolýy tıis», dedi.
Rasynda bizder kúrdeli de kúrmeýli, sát saıyn ózgerip, jańasha jaǵdaılar men talaptar týyndatyp otyrǵan ǵalamda ómir súrýdemiz. Búginde balalarǵa jalań bazalyq bilim berip qoıý jetkiliksiz. Bilimmen qatar fýnksııalyq saýattylyqty arttyrý maqsaty túnektegi «jaryq juldyz» syndy bizdiń negizgi baǵdarshamymyz bolýy qajet. Bul degenimiz – oqýshy boıynda analız jáne sıntez jasaý, ózin ózi baǵalaý, synı oılaý jáne qorytyndy jasaı bilý sııaqty joǵary deńgeıdegi mashyqtardy damytý. Osy turǵydan alyp qaraǵanda Joldaýdyń barlyq on tarmaǵy, onyń ishinde «aqyldy tehnologııalardy» damytý, qarjy sektoryn «qaıta jańǵyrtý», kólik-logıstıka ınfraqurylymynyń tıimdiligin arttyrý tarmaqtary tikeleı nemese janama túrde bilim salasyn qubylmaly álemniń, sondaı-aq tórtinshi ónerkásiptik revolıýsııa jaǵdaıyndaǵy damýdyń talaptaryna sáıkestendirý qajettigin kózdeıdi.
Bilim berý salasyn jańartylǵan mazmunǵa kóshirý barysynda aldymyzda mynadaı tórt mindet tur. Birinshiden, turaqty damyp otyrý, oqytylyp jatqan jalpy oqý baǵdarlamalaryna taldaý jasaý. Ekinshiden, baǵalaý júıesin jetildirý. Sebebi bul jańa baǵdarlamanyń qalaı iske asyp jatqanyn jáne onyń nátıjesin kórsetetin birden-bir dúnıe. Úshinshiden, mektepterde ıgilikti bilim ortasyn qalyptastyrý: bala mektepte ózin erkin sezinip, ustazdary men qurbylary arasyndaǵy qarym-qatynas meılinshe meıirimdi bolýy abzal. Sońǵy tórtinshi talap, materıaldyq-tehnıkalyq bazany tıimdi paıdalaný. Búkil mektep zerthanalary men ınfraqurylymdary birlesip, pánderdi oqytý men balany damytýda barlyǵy ortaq shyǵarmashylyq zerthanaǵa ári ortaq shyǵarmashylyq damytý ortalyǵyna aınalyp, jumyla jumys atqarýy tıis.
Prezıdent jas urpaqty ǵylymı-zertteý jáne óndiristik tehnologııalar jumystaryna tartýdyń mańyzdylyǵyn atap ótti. Balalar úshin jańa tehnologııalar qoljetimdi bolýy kerek. Oqý baǵdarlamasy árdaıym elektıvti kýrstarmen tolyqtyrylyp otyrýy qajet-aq. Eger mektepten tys uıymdar robot-tehnıka kabınetterimen, 3D prınterlermen jáne basqa da tehnıkalarmen qamtamasyz etilse, erteń mekteptegi bilim sapasy da damıdy, sebebi balada oqýǵa degen qyzyǵýshylyq jumysty tehnıkada óz qolymen jasaý jáne baǵdarlamalar qurastyrý barysynda oıanady. Joldaýdyń jetinshi baǵytynda ustazdardyń biliktiligin arttyrý týraly, osyǵan baılanysty pedagogıkalyq joǵary oqý oryndaryna mamandardy ázirleý júıesin tolyqtaı qaıta qaraý týraly másele aıtylǵan. Bul óte ózekti másele, sebebi bilim salasyndaǵy negizgi tirek – óz isin, balalardyń psıhologııasy men jas ereksheligin jáne oqytý metodıkasy men tehnologııasyn meńgergen muǵalim. Prezıdent oqytýshylardyń jalaqysy muǵalimniń biliktiligine sáıkes tólenetindigin aıtty, sol sebepti qazir bilim júıesinde ulttyq biliktilik testine daıyndyq bastalyp ketti. Bul jaǵymdy jańalyq muǵalimderge budan ári ózin ózi damytyp otyrýǵa jol ashatyn boldy.
Nazarbaev zııatkerlik mektepteriniń mıssııasy – úzdik qazaqstandyq dástúrler men halyqaralyq tájirıbege negizdelgen bilim berýdiń ınnovasııalyq júıesin ázirleý jáne ózindik tájirıbeni elimizdiń jalpy bilim berý júıesine taratý. Basqa sózben aıtqanda, bizdiń mektepter – tájirıbe alańy. Memleket basshysy zııatkerlik mektepter bilim júıesine jańa standarttardy engizýge kómektesetin, óńirlerdegi negizgi ádistemelik ortalyqqa aınalýy kerektigin tapsyrdy. Búginde olar shyn máninde kópshilikke baǵyt-baǵdar beretin ádistemelik ortalyqqa aınaldy: biz Nazarbaev zııatkerlik mektepterinde baǵdarlamalar ázirlep, olardy túsindrý boıynsha elimizdiń túkpir-túkpirindegi muǵalimderge arnap kóptegen semınar ótkizýdemiz. Bizde jańa tehnologııalardyń arqasynda onlaın-rejimdegi júıelik-ádistemelik keshen jumys isteıdi. «Nazarbaev zııatkerlik mektepteri» DBBU janynan ashylǵan bilim berý resýrsy, pedagogıkalyq sheberlik, pedagogıkalyq ólshemder, bilim berý baǵdarlamalary ortalyqtary elimizdiń ustazdaryna turaqty kómektesip, qoldaý bildirip otyrady.
Prezıdent Joldaýy elimizdiń ustazdar qaýymyna berilgen kart-blansh dep esepteımin, ıaǵnı Joldaý basymdyǵy bilimde dep bilemin. Osy múmkindikti paıdalanyp, oqý prosesine bilim berýdiń jańa mazmunyn engizýimiz qajet.
Kúlásh ShÁMShIDINOVA, «Nazarbaev zııatkerlik mektepteri» DBBU basqarma tóraıymy