«Astana» halyqaralyq qarjy ortalyǵy delegasııasy Shveısarııanyń Davos qalasynda ótip jatqan Dúnıejúzilik ekonomıkalyq forýmǵa (DEF) qatysýda, dep habarlaıdy AHQO baspasóz qyzmeti.
Forým aıasynda AHQO Thomson Reuters halyqaralyq agenttigimen birlese otyryp, «Those who dare win: exploring new frontiers» («Jeńiske jetýden qoryqpaý: jańa belesterdi baǵyndyrý») taqyrybynda paneldik talqylaý jıynyn ótkizdi. Sessııanyń negizgi maqsaty - damyp jatqan naryqtardyń ınvestısııalyq tartymdylyǵyn talqylaý bolatyn. Odan bólek, halyqaralyq bıznes ortanyń ókilderine AHQO múmkindikteri tanystyryldy.
Paneldik sessııada spıker retinde IHS Markit ǵylymı-taldaý kompanııasynyń jahandyq energetıkalyq jáne halyqaralyq máseleler jónindegi aǵa vıse-prezıdenti Karlos Paskýal, Abraaj Group basqarýshy seriktesi Mýstafa Abdel-Vadýd, Abraaj Group óńirlik bas dırektory jáne Standard Chartered kommersııalyq jáne jeke banktik bıznes jónindegi bas dırektory Anna Mars, Rýandanyń qarjy jáne ekonomıkalyq josparlaý mınıstri Klaver Gatete sóz sóıledi.
Talqylaý aldynda paneldik sessııanyń qatysýshylary men qonaqtary úshin arnaıy jazylǵan Qazaqstan Respýblıkasynyń Prezıdenti Nursultan Nazarbaevtyń beınejoldaýy tyńdaldy. О́z sózinde Elbasy táýelsizdik jyldaryndaǵy Qazaqstannyń ekonomıkalyq damýyndaǵy negizgi kezeńderdi atap ótip, áleýetti ınvestorlardy Astanada shilde aıynda ótetin AHQO-nyń halyqaralyq tusaýkeser rásimine shaqyrdy. Paneldik talqylaýǵa Qazaqstan Respýblıkasy Premer-Mınıstriniń orynbasary Erbolat Dosaev, QR Qarjy mınıstri Baqyt Sultanov, QR Ulttyq ekonomıka mınıstri Tımýr Súleımenov jáne Shveısarııadaǵy QR Elshisi Janar Aıtjanova jáne jetekshi ınvestorlar men bıznes alpaýyttar qatysty.
«Bıznes ókilderin damýshy naryqtarǵa basa nazar aýdarýǵa, jańa múmkindikterdi zertteýge jáne jumys istep jatqan qarjylyq júıelerge jańa serpin berýge kómektesýge shaqyramyn. О́z kezeginde AHQO yntymaqtastyq úshin biregeı múmkindikter bere alady jáne búkil Eýrazııa keńistigindegi jolbasshy bola alady», - dep atap ótti AHQO basshysy Qaırat Kelimbetov. Búgin AHQO ókilderi qarjylyq tehnologııalarǵa arnalǵan Caspian Week seksııasyna qatysady. Sonymen qatar, AHQO delegasııasy qazirgi tańda jumys istep jatqan jáne yqtımal seriktesterimen birqatar iskerlik kezdesýler ótkizedi.