Qytaıdyń Gýandýn ólkesiniń ákimshilik ortalyǵynda elimizdiń Gýanchjoý qalasyndaǵy Bas konsýldyǵy ashyldy. Endi Qytaıdyń ońtústik óńirlerimen yntymaqtastyqty keńeıtýge múmkindik molaımaq.
Bas konsýldyqtyń ashylý saltanatynda elimizdiń QHR-daǵy elshisi Shahrat Nuryshev qazir Qazaqstan men Qytaı arasyndaǵy qatynastar buryn-sońdy bolmaǵan joǵary deńgeıde ekenin ári máńgilik jan-jaqty strategııalyq áriptestik rýhynda damyp kele jatqanyn atap ótti. Onyń aıtýynsha, Gýanchjoý qalasynda Bas konsýldyqtyń ashylýy óńiraralyq ózara is-qımyldyń mańyzy artyp kele jatqanyn kórsetedi, sondaı-aq Qytaıdyń ońtústik óńirlerimen yntymaqtastyǵyn keńeıtý úshin jańa múmkindikter ashady.
Elshi sondaı-aq Gýandýn ólkesiniń Qytaıdyń jetekshi ekonomıkalyq, ınnovasııalyq jáne ónerkásiptik ortalyqtarynyń biri ekenin atap ótip, onyń saýda, ınvestısııalar, sıfrlyq tehnologııalar, jasandy ıntellekt, elektrondyq kommersııa, logıstıka, ınnovasııalar men mádenı-gýmanıtarlyq almasýlar salalarynda Qazaqstanmen ózara yntymaqtastyqty damytýda eleýli áleýetke ıe ekenin aıtty.
Al QHR Syrtqy ister mınıstriniń kómekshisi Lıý Bın elimizdiń Gýanchjoý qalasyndaǵy Bas konsýldyǵy Qazaqstannyń Qytaıdaǵy tórtinshi konsýldyq mekemesi ekenin jáne ol Qazaqstan men Qytaıdyń ońtústik óńirleri arasyndaǵy baılanystardy odan ári damytýda mańyzdy ról atqaratynyn atap ótti. Buǵan qosa ol Qytaı tarapynyń jańa dıplomatııalyq ókildiktiń qyzmetine jan-jaqty qoldaý kórsetýge daıyn ekenin jetkizdi.
Gýandýn ólkesiniń Halyq úkimeti partııalyq tobynyń múshesi Chen Lıansıan da Qazaqstannyń Gýandýn ólkesiniń Ortalyq Azııadaǵy eń iri saýda áriptesi ekenin atap ótti. Sonymen qatar saýda-ekonomıkalyq, ınvestısııalyq, ǵylymı-tehnıkalyq, bilim berý jáne mádenı-gýmanıtarlyq salalardaǵy yntymaqtastyq deńgeıi turaqty ósim kórsetip otyrǵanyn málimdedi.
Elshiniń aıtýynsha, elimizdiń Gýanchjoý qalasyndaǵy Bas konsýldyǵynyń ashylýy – Qazaqstan-Qytaı qarym-qatynasy tarıhyndaǵy mańyzdy ýaqıǵa. Jańa konsýldyq mekeme saıası dıalogti odan ári nyǵaıtýǵa, óńiraralyq yntymaqtastyqty keńeıtýge, saýda-ekonomıkalyq jáne ınvestısııalyq baılanystardy ilgeriletýge, sondaı-aq eki el arasyndaǵy mádenı-gýmanıtarlyq ózara is-qımyldy tereńdetýge yqpal etedi.