Premer-mınıstr Oljas Bektenov laýazymdyq mindetterin atqarýǵa bıylǵy aqpan aıynda kirisken Halyqaralyq valıýta qorynyń Qazaqstan boıynsha mıssııasynyń basshysy Amına Lareshpen kezdesý ótkizdi.
Onda HVQ sarapshylar tobynyń el ekonomıkasynyń keıingi úrdisterin, júrgizilip jatqan reformalardyń basymdyqtaryn, odan ári damý perspektıvalaryn zerdeleý jónindegi qyzmetiniń aldyn ala qorytyndylary qaraldy.
Premer-mınıstr Oljas Bektenov seriktestiktiń mańyzdylyǵyna toqtala otyryp, elimizdiń ekonomıkalyq saıa-satyn jetildirýdegi saraptamalyq súıemeldeýdiń rólin atap ótti. Elimizde qabyldanǵan jańa Konstıtýsııa ártaraptandyrylǵan ornyqty ekonomıkany damytýǵa ınstıtýsıonaldyq negiz qalaıdy. Prezıdent Qasym-Jomart Toqaevtyń tapsyrmalaryna sáıkes ekonomıkalyq jańǵyrtýdyń keshendi kún tártibi júzege asyrylyp jatyr.
«Biz Qazaqstannyń ekonomıkalyq damýynda mańyzdy ról atqaratyn Halyqaralyq valıýta qorymen áriptestigimizdi joǵary baǵalaımyz. Bul dıalog HVQ-nyń turaqty mıssııalary, maqsatty keńesteri jáne memlekettik organdarǵa kórsetiletin tehnıkalyq kómegi aıasynda jalǵasyp otyr. Aǵymdaǵy mıssııanyń qorytyndylary boıynsha usynymdar elimizdiń makroekonomıkalyq jáne makroprýdensıaldyq saıasatyn odan ári jetildirý úshin qundy baǵdar bolady dep senemin», dedi Úkimet basshysy.
HVQ-nyń Qazaqstan boıynsha mıssııasynyń basshysy Amına Laresh makroekonomıkalyq turaqtylyqty qamtamasyz etý men ınflıasııalyq qysymdy tómendetýde memleket qabyldap jatqan sharalardyń mańyzdylyǵyn atap ótti. Sondaı-aq Úkimettiń, Ulttyq banktiń, Qarjy naryǵyn retteý jáne damytý agenttiginiń úılestirilgen jumysy qarjy sektoryndaǵy turaqtylyqty saqtaýdyń mańyzdy tetigi ekeni aıtyldy.
«Búginde Qazaqstan ekonomıkasy damýynyń oń dınamıkasyn atap ótýge bolady. Munaı jetkizilimine baılanysty syrtqy faktorlardyń tıimdi ótemaqysy nátıjesinde tólem balansynyń jaǵdaıy jaqsaryp, ekonomıka turaqtylyqty kórsetip keledi. Sondaı-aq ekonomıkalyq saıasat pen qabyldanyp jatqan sheshimder júıeli túrde jetildirilip kele jatyr. Makroekonomıkalyq turaqtandyrýǵa yqpal etetin júrgizilip jatqan aqsha-nesıe saıasatyn oń baǵalaımyz. Ekonomıkalyq ósýdiń joǵary qarqynyn saqtaı otyryp, ınflıasııalyq qysymnyń birtindep tómendeýi baıqalady. Biz Úkimettiń, Ulttyq banktiń jáne Qarjy naryǵyn retteý men damytý jónindegi agenttiktiń birlesken is-qımyl jos-paryn qabyldaýyn quptaımyz jáne ekonomıkalyq saıasatty júzege asyrýǵa úılestirilgen kózqaras makroekonomıkalyq turaqtylyqty odan ári nyǵaıtýǵa, Qazaqstan ekonomıkasynyń turaqty damýyna yqpal etedi dep senemiz», dedi A.Laresh.
Qor sarapshylary ekonomıkalyq ósimniń turaqty ekenin atap ótti. О́ńdeý ónerkásibin, qyzmet kórsetý salalaryn, kólik pen qurylys sektorlaryn damytýǵa baǵyttalǵan júıeli sharalar munaı óndirý kóleminiń qysqarýynyń ornyn toltyryp otyr. Inflıasııa qarqynyn báseńdetý, salyqtyq ákimshilendirýdi jaqsartý, fıskaldyq saıasatty jetildirý baǵyttarynda ilgerileý baıqalady. Bul baǵytta ınflıasııalyq táýekelderdi odan ári tómendetý men kvazıfıskaldyq saıasatty jaqsartýǵa qatysty birqatar usynys aıtyldy.
Talqylaýǵa Prezıdent keńesshisi – Strategııalyq josparlaý jáne reformalar agenttiginiń tóraǵasy Áset Erǵalıev, Qarjy mınıstri Mádı Takıev, Ulttyq ekonomıka birinshi vıse-mınıstri Azamat Ámrın, Ulttyq bank tóraǵasynyń orynbasary Álııa Moldabekova qatysty.
Kezdesý qorytyndysynda Premer-mınıstr Oljas Bektenov Amına Laresh pen HVQ komandasyna reformalardy júzege asyrýda qoldaý kórsetkeni úshin alǵysyn bildirdi. El Úkimeti ózara tıimdi áriptestikti odan ári nyǵaıtýǵa baǵyttalǵan syndarly dıalogke ashyq. Sapar nátıjesinde Halyqaralyq valıýta qorynyń usynystary salalyq memlekettik organdar tarapynan qaralady.