Bıyl óńirde 5 mln gektar alqapqa tuqym sebý josparlanǵan. Oblystyq aýyl sharýashylyǵy basqarmasynyń málimetinshe, aýylsharýashylyq qurylymdary búginge deıin egis alqabynyń 97 paıyzyna dán seýip alǵan. Bıyl dástúrli daqyl bıdaıǵa qaraǵanda anaǵurlym baǵaly ári naryqta joǵary suranysqa ıe maıly, burshaqty daqyldyń kólemi edáýir ulǵaıyp otyr.
Dıqandar kóktemgi aýa raıy sharýashylyqqa qolaıly boldy dep otyr. Máselen, alqap jumysyn elden buryn aıaqtaǵan Qostanaı aýdanyndaǵy «Borıs Romanovskıı» seriktestigi 10 myń gektardan asa alqapqa tuqym sepken. Onyń 5,5 myń gektaryn bıdaı, 5 myń gektaryn maıly daqyl alyp jatyr.
«Bıyl topyraq ylǵaly jaqsy. Onyń ústine parlap, tuqymnyń oıdaǵydaı ónip-ósip, jetilýine qajet zamanaýı tehnologııa múmkindikterin paıdalandyq. Kúnbaǵys, raps, jasymyq, zyǵyr tárizdi marjınaldyq daqyldarǵa tyńaıtqysh shashtyq», deıdi seriktestiktiń basqarma dırektory Qanat Orynbasarov.
Atalǵan seriktestik ótken jyly joǵarǵy ónimge qol jetkizip, gektaryna 27 sentnerden bıdaı, 24–25 sentner maıly daqyl alǵan. Elıtaly bıdaı tuqymyn óndiretin óńirdegi 36 iri sharýashylyqtyń biri sanalatyn «Borıs Romanovskıı» JShS keıingi jyldary maldyń qıyn jańbyr qurty arqyly óńdep, qarashirikke aınaldyryp, qunarly tabıǵı tyńaıtqysh ala bastady.
«Kalıfornııalyq qurttardy paıdalana otyryp, tolyqtaı organıkalyq negizde suıyq tyńaıtqysh əzirlep jatyrmyz. Tórt kúnde 10 myń lıtr alýǵa bolady. Biz muny tórt jyl boıy ǵylymı synaqtan ótkizip, bıyldan bastap tolyqtaı bızneske engize bastadyq», deıdi joba avtory Naýryzbek Birmaǵambetov.
Seriktestik basshysy Aldabergen Jumaǵulovtyń aıtýynsha, bıogýmýs arqyly bir gektar alqaptan alynatyn ónim kólemin úsh sentnerge deıin arttyrýǵa bolady.
«Byltyr gektaryna 27 sentnerden ónim alýymyzǵa da osy tabıǵı tyńaıtqyshtyń septigi tıdi. Biz bul bıostımýlıatordy tuqymdy dərileý barysynda, keıin tuqym ónip, ósip-jetile bastaǵan kezde paıdalanamyz. Biz óz tyńaıtqyshymyzdy reseılik, ıspandyq ónimdermen salystyrý úshin hımııalyq zerthanaǵa jiberip kórdik. Taldaý nátıjesi, ózimizdiń bıostımýlıator olardan bir mysqal kem emes ekenin kórsetti. Tipti keıbir tusta hımııalyq tyńaıtqyshtan asyp túsedi. Munyń syrtynda sheteldiń tyńaıtqyshy qymbat, hımııalyq jolmen jasalatyn qymbat ónimge aqsha shyǵyndaǵansha, tabıǵı jolmen alynatyn tól ónimimizdi paıdalanaıyq dep sheshtik», deıdi sharýashylyq basshysy.
Ádette maýsymdyq qarbalas kezinde sharýalardyń jetkize almaı jatqan jeri bolsa memleket kómekke keledi. Agroónerkásip kesheni bul joly da memleket qoldaýynan kende qalyp jatqan joq. Máselen, jergilikti aýylsharýashylyq taýaryn óndirýshiler bıyl «Keń dala 2» baǵdarlamasy aıasynda 86,5 mlrd teńge jeńildetilgen nesıe alǵan. Nesıe merzimi jarty jyl bolsa, boryshker 2,5 paıyz, bir jyl bolsa 5 paıyz jyldyq ósimpul tóleıdi.
Bıyl óńir sharýashylyqtaryna «Azyq-túlik korporasııasy» arqyly iske asyrylyp jatqan forvardtyq satyp alý baǵdarlamasy boıynsha 16 mlrd teńge kóleminde nesıe berilgen.
Qostanaı oblysy