Qazir el óńirleri men aımaqtary ótken jyldyń áleýmettik-ekonomıkalyq damý qorytyndylaryna taldaý jasap, bıylǵy jylǵa jańa mejeler men mindetter belgileý ústinde. Osyndaı baǵyttaǵy basqosý ótken aptada Aqtóbe oblystyq ákimdiginde de ótkizildi.
Keńeıtilgen otyrysta birinshi bolyp oblys ákiminiń ekonomıkalyq damý máseleleri jónindegi orynbasary Asqar Bıahmetov esep berdi. Ol oblys aktıvi aldyna shyqqannan keıin óńir ekonomıkasynyń búgingi jaı-kúıi, keleshek kelbeti týraly taldaýlar men saraptamalar, salystyrýlar jasaýdyń ornyna, kópshilikke burynnan belgili derekterdi qaǵazdan bas almaı, birinen soń birin tizip ala jóneldi. Álbette, tyńdalmasa, kópshiliktiń kóńilin aýdarmasa, sóz jetim emes pe?! Qaptaǵan sıfrlar óńir ekonomıkasynyń tamyr soǵysyn bildire ala ma?! Ekonomıka kýratory óńirge tartylatyn ınvestısııalyq qara jattyń basty bóligi men múmkindikterin jáne bıýdjettiń kiris kózderin jan-jaqty tarqatyp bergen jaǵdaıda utymdylyq pen utqyrlyqqa jol asha alar edi. О́kinishke qaraı, olaı bolmady. A.Bıahmetov qarjy ınstıtýttarymen baılanys, olardan tartylatyn qarajat kólemi týraly da eshteńe aıta almady.
Jyl qorytyndysyndaǵy keıbir derekterge kóz salsaq, oblysta merziminde tólenbegen salyq mólsheri kóbeıip bara jatqany baıqalady. Sondaıaq bıýdjetke túsetin qosymsha salyq mólsherin ósirý isinde de kidirister bar. Bul jaıttar keńeıtilgen otyrys barysynda da aıtyldy. О́tken jyly gazetimizde Aqtóbe aımaǵyndaǵy turyp qalǵan kásiporyndar jóninde saraptamalyq maqala jarııalanǵan bolatyn. Sodan beri ony saýyqtyrý men qalpyna keltirý jóninde naqty ister qolǵa alynǵanynan da habardarmyz. Jyldyń ekonomıkalyq esebine kiretin máseleniń biri de osy bolsa kerek-ti. Sondaı-aq ótken jyl ishindegi áleýmettik ekonomıkalyq damý qorytyndylary boıynsha sóz qozǵaǵan kezde óńirdegi aglomerasııalyq damý deńgeıi men baǵyttary týraly aıtylmaı qalsa, qazaq ádebıetiniń aqsaqaly Sherhan Murtaza aıtqandaı «bir kem dúnıe» bolyp shyǵady.
Aqtóbe oblysynyń ákimi Berdibek Saparbaev alqa májilisi ústinde oryndy atap kórsetkendeı, onyń jumysshy organy Úkimet te, mınıstrlikter de nemese ortalyqtaǵy ózge de basqarýshy býyndar emes, naqty osy Aqtóbe oblysy ákimdiginiń ózi bolyp otyr. Endeshe Aqtóbe aglomerasııasyn damytýǵa múddeli eń birinshi ókiletti tulǵalar jergilikti atqarýshy uıymdar bolýy kerek. О́z kezeginde bul iske tikeleı jetekshilik jasaıtyn oblys ákiminiń ekonomıka jónindegi orynbasary A.Bıahmetovtiń tarapynan aglomerasııanyń jaıkúıine qatysty bir aýyz sóz aı tylmaǵanyn qalaı túsinýge bolady?!
Eger óńir basshysy buǵan baılanysty tıisti tolyqtyrýlar jasamaǵanda, óńirdiń ekonomıkalyq damýynyń basty ındeksi men kórsetkishi sıpatyndaǵy kókeıkesti másele jabýly kúıinde qalyp qoıar ma edi. Oblys ekonomıkasyna negizinen strategııalyq shıkizat kózderi men ózge de qazba baılyqtardy óndirý, ındýstrııalandyrýdy damytý jáne óndiris pen ónerkásipti órkendetý sıpaty tán bolǵanymen, Aqtóbe elimizdiń agrarlyq óńirleri qatarynda qala beretini anyq. Sondyqtan munda tıisti ónerkásip keshenin odan ári damytýdyń búgingi taktıkasy men aldaǵy strategııasy naqty túrde belgilenýi tıis.
Osy oraıda keńeıtilgen alqa májilisinde oblys ákiminiń aýyl sharýashylyǵy salasyna jetekshilik jasaıtyn oryn basary Mavr Abdýllın bul baǵytta qolǵa alynatyn baǵdarlamalarǵa, aımaqtaǵy aýyl sharýashylyǵy salasynda óz sheshimin kútip turǵan isterge tereń taldaýlar jasaıtyn shyǵar dep kútken edik. Bul úmitimiz de aqtala qoımady. Osy rette oblys ákimdiginiń keńeıtilgen otyrysynda joǵaryda aıtylǵandaı keıbir jetekshilerdiń esebi qurǵaq sóz, jalań statıstıka tóńireginen shyǵa almaı qalǵany ókinishti-aq.
Temir QUSAIYN,
«Egemen Qazaqstan»
AQTО́BE