Jaqynda Ońtústik Qazaqstan oblysynyń ákimi Janseıit Túımebev «Shymkent qalasyndaǵy qoǵamdyq kólik salasyn damytý» forýmyna qatysý úshin óńirimizge arnaıy kelgen otandyq jáne sheteldik kompanııalardyń ókilderimen kezdesti.
- Elbasy bıylǵy halyqqa arnaǵan Joldaýynda megapolıs qalalardyń problemalaryn tıimdi sheshý úshin «Smart Sıtı» tujyrymdamasy men qalalyq ortany basqarýdyń keshendi túrin engizý qajet ekenin aıtqan bolatyn. Osy rette mıllıonǵa tarta turǵyny bar Shymkent qalasyn aqyldy qalaǵa aınaldyrý - kezek kúttirmeıtin máseleniń biri. Sonyń biri jolaýshylar tasymaldaıtyn avtobýstardy jańalaý, ıaǵnı ózderińiz aıtyp otyrǵandaı sońǵy úlgidegi tehnologııalardyń kómegimen halyqtyń júrip-turýyn jeńildetýimiz qajet, - dedi Janseıit Qanseıituly.
Forýmǵa elimizden bólek Reseı, Belorýs, О́zbekstan jáne QHR-diń avtobýs qurastyrýshy zaýyttarynyń ókilderi arnaıy kelgen. Sharanyń maqsaty – shahardaǵy jolaýshylar tasymaldaý qyzmetiniń sapasyn arttyrý. Árbir qatysýshy ózderi óndirip otyrǵan avtobýstardyń sapasy joǵary, tıimdi baǵada ekenin aıtady. Olardyń aıtýynsha, qoǵamdyq kólikke ornatylǵan monıtorıng, tólem, «GPS» júıeleri men mobıldi qosymshalar jolaýshylarǵa kórsetiletin qyzmettiń sapasyn jaqsartýǵa mol múmkindik beredi.
Baqtııar TAIJAN,
«Egemen Qazaqstan»
Ońtústik Qazaqstan oblysy