Kóne Saraıshyq shaharyna balalardyń qyzyqty sapary mýltfılmge arqaý boldy.
Atyraý oblystyq ákimdiginiń tapsyrysymen Q-Daily Medıa ortalyǵy daıyndaǵan mýltıplıkasııalyq fılm ádemi de áserli shyqqan. «Rýhanı jańǵyrý» baǵdarlamasy aıasynda túsirilgen bul týyndy tarıhı oryndardy nasıhattap, óskeleń urpaqty babalar júrip ótken jolmen tanystyrýdy maqsat etken.
– 10 bólimnen turatyn «Saraıshyqqa saıahat» - Qazaqstandaǵy jańa tehnologııamen jasalǵan alǵashqy mýltıplıkasııalyq fılm, - deıdi joba prodıýseri Azamat Atageldıev. – Ony qurastyrýǵa eki aı ýaqyt ketti. Kishkene kórermenderdiń kóńilderinen shyǵady degen senimdemiz.
«Saraıshyqqa saıahatty» aldymen oblys ortalyǵyndaǵy mektepterdiń 400-ge jýyq bastaýysh synyp oqýshylary tamashalady. Endi jańa fılmmen basqa balalar da tanysady.
Baqytgúl BABASh
«Egemen Qazaqstan»
ATYRAÝ