Qazaqstan Respýblıkasynyń Tuńǵysh Prezıdenti – Elbasy kitaphanasynda Memleket basshysynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty Joldaýynyń negizgi basymdyqtary talqylandy. Dóńgelek ústelge elimizdiń belgili tarıhshylary men saıasattanýshylary qatysty.
Jıynnyń moderatory retinde sóz bastaǵan Elbasy kitaphanasy dırektorynyń orynbasary Ámirhan Rahymjanov Joldaýda aıtylǵan bilim berýdiń ozyq júıesin qurý máselesine aıryqsha toqtaldy. «Mektepke deıingi bilim berý júıesinen bastap joǵary bilim berý júıesine deıingi baǵdarlamalardyń maqsaty – ózgeristerge beıim bolý jáne jańa bilimdi meńgere bilý qabiletterin damytý bolyp otyr. Demek, Joldaýda kózdelip otyrǵan jańa bilim berý júıesin ınvestısııalyq jobalary men eksporttyq áleýeti bar ekonomıkanyń bir salasy dep qarastyrýǵa bolady», dedi ol.
Basqosýda «Jastar» ǵylymı-zertteý ortalyǵy dırektorynyń ǵylym jónindegi orynbasary Á.Qaıdarova, Álemdik ekonomıka jáne saıasat ınstıtýtynyń jetekshi sarapshysy A.Muqyshbaeva, Elbasy kitaphanasy Uıymdastyrý qyzmetiniń basshysy J.Qýanyshev, Elbasy kitaphanasynyń jetekshi ǵylymı qyzmetkeri S.Berdagýlova, Qazaqstan strategııalyq zertteýler ınstıtýty Áleýmettik-ekonomıkalyq zertteýler bóliminiń aǵa ǵylymı qyzmetkeri A.Alshanskaıa Joldaý basymdyqtarynyń mańyzdylyǵy jóninde baıandama oqydy.
– Memleket basshysy Joldaýda adamı kapıtaldy damytý máselesine zor kóńil bóldi. Ony qalyptastyrý alǵysharttarynyń biri – sapaly bilim berý júıesin qurý. Demek, negizgi ózgerister pedagogtar men jastar qaýymyna baılanysty bolýy tıis. Olar – jańa Qazaqstan qoǵamyn qalyptastyrýdyń negizgi faktory, – dedi Memleket tarıhy ınstıtýty dırektorynyń orynbasary Amangeldi Qashqymbaev.
Sonymen qatar jıyn barysynda Elbasy kitaphanasy dırektorynyń orynbasarlary T.Shaımergenov jáne B.Qaıypova qujattyń strategııalyq mańyzdylyǵyna keńinen toqtaldy.
Nurlybek DOSYBAI, «Egemen Qazaqstan»