Qostanaı qalasynyń ákimi Bazyl Jaqypov oblys ortalyǵyndaǵy ótken jylǵy damý baǵytyn baıandap berdi.
Ekonomıkanyń damýynda, áleýmettik jaǵdaıdyń jaqsarýynda da, jalpy barlyq salada alǵa jyljý bar. Bazyl Shahamanuly aldymen ónerkásip kásiporyndarynyń kórsetkishin tilge tıek etti. Olar óndirgen ónim burnaǵy jylmen salystyrǵanda 25 paıyzǵa artyq. Iаǵnı 2017 jyly oblys ortalyǵynda 266 mlrd teńgeniń ónimi óndirilgen. Qala bıýdjetine 26 mlrd teńge túsken. Bul 2016 jylǵa qaraǵanda 10 paıyzǵa kóp.
Degenmen, metallýrgııa, shaǵyn jáne orta bıznes salalarynyń álde de shaban qımyldan asa almaı otyrǵany da aıtyldy. Mysaly, metallýrgııa salasy óndirgen ónimniń kólemi 2016 jylǵa qaraǵanda 71 paıyz bolsa, shaǵyn jáne orta bıznes 76 paıyzdy quraǵan.
Kezdesýde qala turǵyndary ákimge túrli problemalyq máselelerdi kóterdi. Aýyz sý máselesi, joldar, qala ishindegi kólik baǵyttary, saıabaqtar, jer telimi, aýrý balalardy saýyqtyrý ortalyǵy jáne jetim balalar baspanasy, kóshedegi aǵashtardyń kesilýi, «KazTransGaz Aımak» kompanııasynyń turǵyndarmen jumysy týraly kóptegen suraqtar qoıdy. Qala ákimi Bazyl Jaqypov barlyǵyna jaýap berdi, kótergen máselesine oraı turǵyndardy qabyldaýǵa, olarǵa kómek berýge daıyn ekendigin, ótkir máselelerdiń sheshimin qarastyratynyn aıtty.
Qala ákiminiń qorytyndy esebine oblys ákimi Arhımed Muhambetov qatysyp, turǵyndar kótergen keıbir máselelerge óz pikirin de bildirdi. Jáne qala ákiminiń esebin qorytyndylady. Ol Qostanaı qalasynda kóptegen istiń atqarylǵandyǵyn, turǵyndar kótergen máselelerdiń durys sheshimin qarastyrý kerektigin aıtty.
Názıra Járimbet,
«Egemen Qazaqstan»
Qostanaı