Oqyrman oıy
Ár úıge 10 túp jemis aǵashy otyrǵyzyldy
Adamzattyń aldynda turǵan basty paryzdarynyń biri – aǵash egý ekeni belgili. Aýdan ákimdiginiń bastamasymen, «Nur Otan» partııasynyń aýdandyq fılıaly, Sholaqqorǵan aýyldyq ákimdigi, Sholaqqorǵan aýylyndaǵy mektepter, Sozaq orman jáne janýarlar álemin qorǵaý jónindegi memlekettik mekemesi qyzmetkerleri «Meıirimdi tabıǵat» atty qaıyrymdylyq aksııasyn ótkizdi. Aksııa aıasynda aýdan boıynsha az qamtylǵan otbasylar men múgedektigi saldarynan ózine-ózi kútim jasaı almaıtyn azamattardyń jeke turǵyn úıleriniń aýlasyna 10 túpten jemis aǵashtary otyrǵyzyldy. Ár otbasyǵa 4 túp alma, 3 túp órik pen 3 túp almurt kóshetterinen keldi.
Aýdan boıynsha barlyǵy 73 otbasyna 730 jemis kóshetteri tartý etildi. Turǵylyqty jerimizdiń tal-teregin jaıqaltyp, gúlmen kómkerilgen baqqa aınaldyryp, aýylymyzdyń ajarly bolýyna úles qosý kimniń bolsa da azamattyq paryzy. «Babalar ekken shynardy balalary saıalaıdy» demekshi, otyrǵyzǵan jasyl jelekterimiz tez jersinip, balǵyndarymyz maqtanyshpen aıta júrip, saıasynda emin-erkin asyr salyp oınaýy biz úshin úlken qýanysh. Aǵashtardy egip qana qoımaı, olardy standartty jaǵdaıǵa jetkenge deıin keminde úsh jyl boıy tolyqtyrý, kútim, qorǵaý jumystaryn oryndap otyrýymyz qajet, deıdi orman sharýashylyǵynyń mamandary.
Maqsat QARǴABAI Ońtústik Qazaqstan oblysy
Ysyrapshylyq astamshylyqqa soqtyrady
Gazetterińizdegi Serikbaı Turjannyń «Ysyrapshyl dástúrden arylaıyq!» atty maqalasyn oqyǵannan keıin qolyma qalam aldym. О́ıtkeni bul bir adamdy ǵana tolǵandyryp júrgen másele emes. Qazaqstannyń qaı túkpirine barsań da ólikti jóneltýdegi ysyrapshyldyqty aıtyp ta, jazyp ta júr. Biraq áli de bir ortaq sheshimge kelgen joqpyz. «Qazaqstannyń qaı túkpirine barsań da» dep otyrǵanym, avtor ońtústiktegi jaǵdaıdy jazyp otyr, bizde soltústikte de dál osyndaı jaǵdaı.
Aldymen aıtarym, janashyrlar jınalyp keńeskende «halyq kóp jınalýǵa tıisti, úsh jylqy soıý kerek» degen sheshimge jıi keledi. Muny qalaı ysyrapshyldyq demessiń? Astanadan bastap, bizdiń soltústik óńirde tabaqtaǵy etti taratyp alý bar, as úıge birer japyraq týralǵan et qana qaıtady. Múshelep tabaq tartsań kem degende 700-800 adam jınalǵan jerde úsh jylqyń da az bolýy múmkin...
Al, janaza dastarhanyna etpen birge neshe túrli salattar, shaıǵa jemis-jıdektiń, táttilerdiń túr-túri kelýi ysyrapshyldyq emeı nemene? Baýyrsaq, sary maı, qant salsaq jetpeı me? Duǵa – toı emes qoı! Ysyrapshylyq aqyry astamshylyqqa aparyp soqtyrady. Duǵadaǵy as mázirin jalpy qazaq elinde bir arnaǵa túsirý qajet.
Avtor jazǵandaı «Jasy 80-90-ǵa kelgen qarııalarǵa ǵana: «Tábárik bolsyn, jasymyz soǵan jetsin!» dep yrymdap, jyrtystyń berilgeni de durys shyǵar, al bylaı áıteýir jappaı jyrtys, telim úlestire berýdi men ózim dúnıe shashý dep bilemin» dep, men de bul jazǵandaryn qoldaımyn, tek 70 emes, 80-nen asqan qarııalarǵa desek durys bolar edi.
Sovet HAMITULY, eńbek ardageri Kókshetaý
Balýannyń esimi umyt qalmasa...
Tehnıka ǵylymdarynyń kandıdaty, dosent, belgili balýan, KSRO sport sheberi, erkin kúresten Qazaq KSR-niń birneshe dúrkin chempıony, KSRO birinshiliginiń úsh dúrkin qola júldegeri atanǵan Quljabaı Altynbekovtiń esimi bir Ońtústik Qazaqstan oblysyna ǵana emes, búkil qazaqqa belgili. Ǵylym men sportty ómiriniń basty maqsaty sanaǵan Quljabaı Altynbekov keńes dáýiri keziniń ózinde fızıka páninen joǵary oqý oryndary men mektep oqýshylaryna arnap qazaq tilinde oqýlyq jazǵan belgili ǵalym.
Árqashan da azamattyqtyń týyn joǵary ustaǵan ónegeli ustaz, bilikti jattyqtyrýshy Quljabaı Altynbekov nebary 53 jyl ǵana ǵumyr keship, dúnıeden ozdy. О́kinishke qaraı, Ońtústik Qazaqstan oblysynyń ǵylymy men sportynyń órkendeýine sheksiz úles qosqan esil erdiń ardaqty esimi umytylyp barady. Búginge deıin týǵan jeri – Túlkibas aýdany men ózi qyzmet istegen Shymkent qalasynda osy kúnge deıin Quljabaı Altynbekovtyń atyndaǵy bir de bir sport týrnıriniń ótkizilmeýi – aıtar oıymyzdy dáleldese kerek.
Degenmen, ıgiliktiń erte-keshi joq. Ardaqtylarymyzdy qadirleı bileıik. Eli barda kóziniń tirisinde halyq qalaýlysyna aınalǵan Quljabaı Altynbekovtiń esimi umytylmaıdy dep senemiz.
Doqtyrhan TURLYBEK, Halyqaralyq «Alash» ádebı syılyǵynyń laýreaty
Aýyl jastary asarlatty
О́tkende Mańǵystaý aýdandyq jastar resýrstyq ortalyǵynyń uıymdastyrýymen «Rýhanı jańǵyrý» baǵyty aıasynda jáne respýblıkalyq jastar aksııasy negizinde Shetpe aýylynda eńbek jáne tyl ardageri, jalǵyzilikti qarııa Spanǵalı Baıdýllaevtyń úıine qaıyrymdylyq sharasy ótkizildi. Baǵdarlamanyń «Asar» baǵyty boıynsha ótken sharada aýyldyń belsendi janashyr jastary qart S.Baıdýllaevtyń úı-jaıyna jáne aýlasyna tazalyq jumystaryn júrgizdi. Buǵan deıin de aýyl jastary birneshe aýyl turǵyndarynda baryp, qaıyrymdylyq is sharasyn ótkizgen edi. Aýyl jastary úı jaılaryn tazalap qana qoımaı, ár senbi saıyn jalǵyzilikti qarttardyń hal-jaǵdaılaryn bilip turady. Qajet bolsa jedel járdem shaqyrtyp, densaýlyqtaryn qaraýǵa járdemdesip keledi.
Shetpede qazirgi tańda 5 jalǵyzilikti qarııa turyp jatyr. Barlyǵy da memleket qamqorlyǵynda. Atalmysh sharaǵa Shetpedegi A.Meńdalyuly atyndaǵy orta mekteptiń joǵary synyp oqýshylary men jasotandyqtar atsalysty.
Allabergen QONARBAEV Mańǵystaý oblysy
Jańa mektepterge el rıza
Jambyldyq 2 400 oqýshy jańa mektepterde bilim nárinen sýsyndaýda. Olardyń biri «Saltanat» shaǵyn aýdanyndaǵy №30 orta mektep bolsa, ekinshisi «Shóldala» eldi mekeninde ornalasqan 1 200 balaǵa arnalǵan orta mektep. Sonymen qatar oblys ortalyǵyndaǵy kóne mektepterdiń biri – №24 mektep-gımnazııasyna qosymsha salynǵan ǵımarat iske qosylǵan bolatyn.
Atalǵan nysandardyń barlyǵy 2015-2019 jyldardy qamtıtyn ınfraqurylymdy damytýǵa baǵyttalǵan «Nurly jol» baǵdarlamasynyń aıasynda salyndy. №30 mektep-gımnazııasynda buryn balalar apatty jaǵdaıda turǵan ǵımaratta bilim alyp kelgen bolsa, endi olar jalpy aýmaǵy 9 myń sharshy metrdi alyp jatqan jańa da keń synyptarda oqyp jatyr. Orta mekteptiń 46 oqý kabıneti zamanaýı qurylǵylarmen qamtamasyz etilgen. Akt zalyna 350 adam syısa, ashanasynda bir mezgilde 150 bala tamaqtana alady. Sport zalynda sportpen aınalysýǵa arnalǵan jańa qurylǵylar bar. Balalardyń bilim alýyna osyndaı jaǵdaı jasalynyp otyrylǵanyna el-jurt árkez alǵystaryn bidirýde.
Aıdar OSPANALIEV Jambyl oblysy