Ortalyq kommýnıkasııalar qyzmetinde saqtandyrý tólemderin tekserip, emhanaǵa tirkelýge múmkindik beretin jańa memlekettik qyzmet túrlerin iske qosýǵa arnalǵan baspasóz konferensııasy ótti. Is-sharaǵa "Áleýmettik medısınalyq saqtandyrý qory" KEAQ Basqarma tóraıymy Elena Bahmýtova, "Áleýmettik medısınalyq saqtandyrý qory" KEAQ Basqarma tóraıy orynbasary Erik Baıjúnisov jáne "Áleýmettik medısınalyq saqtandyrý qory" KEAQ basqarýshy dırektory Zabıra Orazalıeva qatysty.
Jıyn barysynda Basqarma tóraıymy densaýlyq salasyn damytý Elbasy joldaýynda kórsetilgen mańyzdy máselelerdiń biri ekenin alǵa tartyp, atqarylyp jatqan jumystarǵa toqtalyp ótti.
«"Áleýmettik medısınalyq saqtandyrý qory" KEAQ 2018 jyly qazaqstandyqtarǵa saqtandyrý tólemderi jaıly málimet alýǵa múmkindik beretin jańa memlekettik qyzmet túrlerin ázirlep, emhanaǵa tirkeý qyzmetin jetildirýdi josparlap otyr. О́tken jyldyń ózinde «MSQ: Halyqtyq baqylaý» qosymshasy iske qosylǵan bolatyn. Bul elimizdegi aýrýhanalar men emhanalardyń atqaryp jatqan jumysyn tutynýshylar tarapanynan baǵalap otyrýǵa, olardyń jumysyn baqylap otyrýǵa múmkindik beredi. Sonymen qatar qosymsha arqyly azamattar emhanalarǵa óziniń pikirin qaldyra alady. Bul biz úshinde úlken jeńildik. Sebebi halyqtyń baǵalaýy arqyly biz olardyń jumys jasaý reıtıngin shyǵara alamyz», dedi "Áleýmettik medısınalyq saqtandyrý qory" KEAQ Basqarma tóraıymy Elena Bahmýtova.
Sonymen qatar ol, osy toqsan sońynda azamattar MÁMS júıesine qatysý jáne tólengen jarnalar týraly málimetti Halyqqa qyzmet kórsetý ortalyqtary arqyly alý (HQKO) múmkindigine ıe bolatynyn jetkizdi.
«Bizdiń josparymyz boıynsha, osy toqsan sońynda azamattar MÁMS júıesine qatysý jáne tólengen jarnalar týraly málimetti Halyqqa qyzmet kórsetý ortalyqtary arqyly alý (HQKO) múmkindigine ıe bolmaq. Mysaly, qazir osyǵan uqsas qyzmetterdi "elektrondy úkimettiń" egov.kz portaly arqyly alýǵa bolady. Ol úshin elektrondy sıfrlyq qoltańba qajet. Sıfrlyq qoltańbasy bar kez-kelgen azamat "jeke kabınetke" kirip, MÁMS tólemderiniń sońǵy ret qashan jasalǵanyn anyqtap bile alady. Munyń kópshilik úshin yńǵaıly emestigin azamattarymyz jıi aıtyp júr. Al, bul qyzmet HQKO arqyly kórsetile bastaǵannan keıin turǵyndar óz atyna aýdarylǵan jarnalar men aýdarymdar týraly málimetti, sondaı-aq MÁMS júıesiniń qatysýshysy degen anyqtama qaǵazyn da sol jerden ala alady», dedi Elena Bahmýtova.
Raýan QAIDAR,
«Egemen Qazaqstan».