Memlekettik hatshy sapar aıasynda Túrkııa Respýblıkasy Premer-mınıstriniń orynbasary Hakan Chavýshoǵlynyń shaqyrýymen Qazaqstan men Túrkııa isker áıelderiniń bıznes-forýmyna qatysty, dep habarlaıdy Aqordanyń baspasóz qyzmeti.
Oǵan «Atameken» ulttyq kásipkerler palatasy, Túrkııa saýda palatasy men taýar bırjalarynyń odaǵy, memlekettik organdar jáne áıelder kásipkerlik qoǵamdastyǵynyń ókilderi qatysty.
Memlekettik hatshy quttyqtaý sózinde Qazaqstan Prezıdentiniń 25 jyldan astam tıimdi yntymaqtastyq ornatyp kele jatqan baýyrlas memleketter arasyndaǵy ekijaqty qarym-qatynastyń damýyna erekshe mán beretinin atap ótti.
Gúlshara Ábdiqalyqova Memleket basshysynyń Indýstrııa 4.0 – jańa álemdegi tabysty navıgasııaǵa baǵyttalǵan «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» atty joldaýyna nazar aýdardy. Osy oraıda kásiporyndardy sıfrlandyrýǵa baǵyttalǵan jańa ádister synaqtan ótkiziledi. Bul rette áıelderdiń kásipkerlik qoǵamdastyǵy mańyzdy oryndy ıelenedi.
Memlekettik hatshy Qazaqstanda áıelderdiń múmkindikterin arttyrýǵa baǵyttalǵan memlekettik saıasat júrgizilip jatqanyn aıtty. Búginde áıelderdiń 10,1 paıyzy (43 adam) saıası memlekettik qyzmetshi bolyp sanalady. Parlamenttegi 33 adam nemese depýtattardyń jalpy sanynyń 22 paıyzy – áıelder. Barlyq shaǵyn jáne orta bıznes sýbektileriniń 43 paıyzyn áıelder basqaryp, jumys oryndarynyń 31 paıyzyn (964 myń adamdy) qamtamasyz etip otyr. Dúnıejúzilik ekonomıkalyq forýmnyń Jahandyq básekege qabilettilik ındeksi boıynsha, «áıelderdiń ekonomıkalyq damý salasyna qatysýy jáne múmkindikteri» kórsetkishi jóninen Qazaqstan 30-shy orynda.
Gúlshara Ábdiqalyqova bıyl Qazaqstan aıryqsha mereıtoıdy – Astananyń 20 jyldyǵyn atap ótetinin aıtty. Astana – Táýelsizdiktiń sımvoly, Nursultan Nazarbaev ıdeıasynyń iske asýy jáne barsha qazaqstandyqtar eńbeginiń jemisi.
Forýmda kásipker áıelderdiń ınnovasııalyq bıznes-jobalary tanystyrylyp, qatysýshylar ozyq tájirıbelerin ortaǵa saldy. Sondaı-aq, Qazaqstan men Túrkııa áıelderiniń bıznes-qoǵamdastyǵy arasynda ekonomıkalyq jáne ınvestısııalyq qarym-qatynasty odan ári damytý máseleleri talqylandy.
Budan bólek, forým aıasynda G.Ábdiqalyqova Túrkııa Parlamentiniń spıkeri Ismaıl Kahramanmen, Túrkııa Premer-mınıstriniń orynbasary Hakan Chavýshoǵlymen, Túrkııanyń Otbasy isteri jáne áleýmettik saıasat jónindegi mınıstri Fatma Betıýl Saııan Kaıamen kezdesý ótkizdi.
Kezdesýler barysynda Qazaqstan-Túrkııa qarym-qatynasynyń qazirgi jaǵdaıy, sondaı-aq áleýmettik-ekonomıkalyq jáne mádenı-gýmanıtarlyq yntymaqtastyqtyń perspektıvalary talqylandy.